«Պատասխանատվության հարցերը միայն համեմատությամբ չէ, որ պետք է շեշտադրել». Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Հաճախ է խոսվում, թե՝ ինչպե՞ս է հնարավոր Եվրոպան համեմատել դաշնակցային պարտավորությունը չկատարող Ռուսաստանի հետ, այն դեպքում, երբ Եվրոպան մեր հանդեպ չի ունեցել այդպիսի պարտավորություն:
Ասել եմ բազմիցս, կրկնեմ: Նախ, հարգելի ընկերներ, պատասխանատվության հարցերը միայն համեմատությամբ չէ, որ պետք է շեշտադրել կամ շեշտադրվում են: Պատասխանատվության հարցերը պետք է քննարկել այն սահմանող շրջանագծով:
Երբ կտեսնեք, օրինակ, որ կասեմ կամ կգրեմ, թե ինչո՞ւ Եվրոպան զենքով, զորքով ու զրահով չեկավ Հայաստանը պաշտպանելու, այդ ժամանակ եկեք ու գրեք, թե ինչպես է հնարավոր համեմատել այդպիսի պարտավորություն չունեցող Եվրոպան այդ պարտավորությունն ունեցող Ռուսաստանի հետ:
Երբ չեք տեսնի այդպիսի գրվածք, ուրեմն մի եկեք, և «համեմատելիության» կամ «անհամեմատելիության» այդ փաստարկը պահեք այլ դեպքերի կամ տեղերի համար:
Հայաստանն ու Ադրբեջանը Եվրոպայի Խորհրդի անդամ են, ինչը նշանակում է Եվրոպայի Խորհրդի «ստանդարտներից» բխող հանձնառություններ ու պարտավորություններ, այդ թվում կոնֆլիկտների կարգավորման առնչությամբ, մարդու, քաղաքացու իրավունքներին, և այլն, և այլն: Երբ ես խոսում կամ գրում եմ Եվրոպայի պատասխանատվության մասին, խոսում և գրում եմ հենց այդ իրողության ձևավորած շրջանակով, այլ չեմ ասում, թե ինչո՞ւ չեն եկել զենք ու զրահով: Ես ասում եմ և գրում, թե ինչո՞ւ ԵԽ անդամ Ադրբեջանի հանդեպ չի ձևավորվել և իրագործվել այն վարքագիծը, որը, ըստ տրամաբանության, պետք է հետևի ԵԽ անդամ երկրի այդօրինակ հակամարդկային քաղաքականության մեթոդական դրսևորումներին»: