«Հայ-ռուսական հարաբերությունների սրընթաց զարգացումը հերթական ծանր արկածախնդրությունն է». Վահե Հովհաննիսյան

«Այլընտրանքային նախագծեր» խմբի անդամ Վահե Հովհաննիսյանը ֆեյսբուքյան իր էջում գրում է․ «Wall street journal-ում ծավալուն հոդված է հրապարակվել հայաստանյան վերջին շրջանի զարգացումների շուրջ։ Նյութի հեղինակ Յարոսլավ Տրոֆիմովի հետ նախապես երկար զրույց էինք ունեցել, որից մի հատված նա օգտագործել է հոդվածում։ Ներկայացնում եմ հոդվածում տեղ գտած իմ խոսքի հայերեն թարգմանությունը։ Որպես լրացում՝ ուզում եմ նշել, որ այսօր հայ-ռուսական հարաբերությունների սրընթաց, ծայրահեղ վտանգավոր զարգացումը հերթական ծանր արկածախնդրությունն է, և այսօր ամենակարևոր հարցերից եմ համարում Հայաստանն այդ արկածախնդրությունից զերծ պահելը։ Սա Ռուսասատան-Արևմուտք պարզ նախասիրության խնդիր չէ, և պետական մտածողությամբ գործիչների ու շրջանակների խնդիրն է՝ դուրս գալ պոպուլիզմի հարթությունից։
«Ահագնացող էքզիստենցիալ սպառնալիքը նշանակում է, որ երկիրը պետք է խուսափի Մոսկվայի հետ ուղղակի խզումից, ասում է նախկին պատգամավոր, «Այլընտրանքային նախագծեր խումբ» ընդդիմադիր հարթակի ղեկավար Վահե Հովհաննիսյանը:
«Լիովին փչացնել հարաբերությունները Ռուսաստանի հետ՝ առանց ազգային անվտանգության ապահովման և թուրք-ադրբեջանական ռազմական ներխուժումը կանխելու վերաբերյալ արևմտյան իրական երաշխիքներ ստանալո՞ւ: Սա ուղիղ ճանապարհ է դեպի ինքնասպանություն»,- ասում է նա: «Մենք չենք կարող Ռուսաստանին թշնամի դարձնել։ Այո, այն կարող է լավ դաշնակից չլինել։ Բայց կարող է լինել ահեղ թշնամի»»: