Պետնախարարը՝ Արցախի ու Հայաստանի կառավարությունների հարաբերությունների մասին

Արցախի Հանրային հեռոստաընկերության եթերում պետնախարար Արթուր Հարությունյանն անդրադարձել է ժամանակավոր պաշտպանության կամ փախստականի կարգավիճակի և ՀՀ քաղաքացիություն ստանալու դեպքում արցախցիների իրավունքների թեմային․ «Ժամանակավոր պաշտպանության կարգավիճակը և ՀՀ քաղաքացի լինելու կարգավիճակը տարբեր իրավունքներ և պարտականություններ են սահմանում։ Քաղաքացի դառնալու դեպքում ամբողջ իրավունքներն ու պարտականությունները, այդ թվում՝ զինվորական ծառայություն անցնելու, գործելու են նաև մեր հայրենակիցների համար։ Իսկ ժամանակավոր պաշտպանության կարգավիճակի մասով դեռ կան հարցեր, որոնք պետք է լուծումներ ստանան։
Օրեր առաջ ՀՀ աշխատանքի և սոցիալական հարցերի նախարարությունը պարզաբանում ներկայացրեց նպաստների և կենսաթոշակների մասով, նշվեց, որ պարտադիր չէ ՀՀ քաղաքացիություն ստանալ՝ թոշակառու կամ նպաստառու համարվելու համար։ Անհրաժեշտ է միայն ունենալ հաշվառում Հայաստանում և ՀՀ սահմանված կարգով ստանալ վճարները»,- ասել է Հարությունյանը։

Դիտարկմանը՝ տարածված կարծիք կա, որ ԱՀ ու ՀՀ կառավարությունների հարաբերությունները վատ են, մյուս կողմից էլ խոսում են, որ հանդիպումներ լինում են, Հարությունյանը պատասխանել է․ «Մենք պարբերաբար հանդիպումներ ունենում ենք ՀՀ կառավարության հետ, առաջարկություններ ներկայացնում տարբեր խնդիրների մասով, փորձում ենք կոմունիկացիան ապահովել մեր հայրենակիցների ու ՀՀ կառավարության միջև՝ ծրագրերի արդյունավետ իրականացման համար»։