«Այս լկտիացումը և ուժայինով պաշտպանվելը իշխանության վերջի մասին է խոսում». Աղվան Վարդանյան

Ազգային ժողովի «Հայաստան» խմբակցության պատգամավոր Աղվան Վարդանյանը «Իմնեմնիմի» Podcast հաղորդման շրջանակում խոսելով ներքաղաքական իրավիճակի ու ընդդիմության գործունեության մասին՝ ասել է, ընդդիմությունը գործնականում ոչինչ չի անում «Ընդդիմությունը գործնական դաշտի մեջ բան չի անում, խմորումներ են, տարբեր հարթակներ են առաջանում։ Կարծում եմ՝ գնում ա տարբեր գաղափարների և ուժերի կուտակման փուլ։ Ցավոք գործնական, արագ հանգուցալուծման բաներ չեն երևում։ Կարող եմ մեկ բան ասել․ ես և ինձ նման մտածողները շատ-շատ են և այդ մարդիկ պատրաստ են նաև գործնական քայլերի։ Ե՞րբ կլինի, այս պահին չեմ կարող ասել, բայց որ այս իրավիճակը անընդունելի է և փոխվելու է, դրանում վստահ եմ և ամեն ինչ անելու եմ»,- ասել է Վարդանյանը։ Դիտարկմանը՝ պատերազմից հետո Փաշինյանը վախեցած էր, ընդհատակում էր, բայց, ինչպես տեսնում ենք նա դեռ երկրի ղեկին է, պատգամավորն ասել է․ «2020-ի աշնանը՝ պատերազմից հետո, իսկապես վերջացած էր։ Թաքնված էին, չկային, որևէ մեկը չէր համարձակվի որևէ բառ արտասանել։ Պակասեց վերջին հարվածը. ինչո՞ւ, երկար կարող ենք քննարկել: Աշխարհաքաղաքական բաներ տեղի ունեցան, սպառնալիքներ Թուրքիայից, վստահ եմ նաև Ռուսաստանից, որ բանակի միջամտությունը անթույլատրելի է։ Օգտվելով աշխարհաքաղաքական իրավիճակից և տարբեր ուժային կենտրոնների աջակցությունից, կամաց-կամաց ուժեղացան և էսօր դարձել են լկտի։ Այս լկտիացումը և ուժային բանով պաշտպանվելը իրենց վերջի մասին է խոսում»: