«Մեր օգտին ամեն խրոխտ ելույթ ծախում են Ադրբեջանի վրա, նավթի ու գազի սկիդկա ստանում». Սևակ Հակոբյան

Լրագրող, խմբագիր Սևակ Հակոբյանի ֆեյսբուքյան գրառումը՝ կից տեսանյութով. «ԵՄ դիվանագիտության ղեկավար Ժոզեպ Բորելը վերջերս հայտարարել է, թե՝ Հայաստանի տարածքային ամբողջականության ցանկացած խախտում ծանր հետևանքներ կունենա Ադրբեջանի համար։ Լավ է ասում, բայց այդ ի՞նչ հետևանքներ կունենա։ Շատ ծանոթ նախադասություն է։ Թերթեք միջազգային ու ուկրաինական լրահոսը 2020-21-ին, 2022-ին, ինչ էին ասում բորելները, միշելները, եվրոպական ու ամերիկյան արտադրության՝ մենք Ուկրաինային սատարում ենք, թույլ չենք տա, խիստ հետևանքներ կլինեն և այլն։ Արդյո՞ւնքը։ Ուկրաինան էլ, ժողովուրդն էլ կես են դարձել։ Մենակ կես միլիոնից ավելի զոհ կա։ Ուկրաինան, Հայաստանի տարածքի չափ գերեզման ունի, որոնցում պառկած են 18-45 տարեկան՝ ոչ միայն Զելենսկու, այլ նաև բորելների խոսքերին հավատացած տղերք ու աղջիկներ։
Մատաղից առաջ սաղ գառների ականջը կտրում են ու աղ են տալիս։ Համոզեցին-տարան մսաղաց, բայց բացի ուկրաինացիներից, ո՞ր մեկը կռվի մեջ մտավ Պուտինի հետ, ո՞ր մեկը զինվոր ուղարկեց։ Ուկրաինան, կրկնում եմ, կես ա ընկել, մյուս եվրոպայի մասից քանի՞ միլիմետր ա պակասել։
Սիրելի հայաստանցիներ, եթե ձեզ դուր են գալիս հեռվում կանգնած եվրոպացի պաշտոնյաների կենացները, հարց չկա։ Դա շատ լավ ա, բայց երևի գիտեք, որ եթե մեզ հետ լավ են, Ադրբեջանի հետ շատ ավելի լավ են, որովհետև մեզ ելույթ են նվիրում, նրանց՝ պայմանագրեր, մեր օգտին ամեն խրոխտ ելույթ ծախում են Ադրբեջանի վրա, նավթի ու գազի սկիդկա ստանում։ Ձեր կենացը խմում են, բայց գազ են առնում Ադրբեջանից, փող են տալիս, որ Իսրայելից զենք առնի, Իսրայելին էլ վստահ եմ, խրախուսում են, ոչ մեկ չի դատապարտում։ 4 հատ «Վիլիս» են տալիս, հետո Հայաստանում հարցում է արվում, պարզվում է՝ թիվ 1 դաշնակիցը Ֆրանսիան դարձավ։
Կարո՞ղ եք մի երկրի անուն տալ, որ պատժամիջոց է կիրառել կամ կիրառում Ադրբեջանի նկատմամբ։ Ամերիկայի անունը չտաք։ Հայաստանում ինչ-որ ցնծության մեջ են՝ ԱՄՆ-ն դադարեցրել է Ադրբեջանին ռազմական օգնության տրամադրումը։ Էս շատ գեղեցիկ վերնագրի տակ ի՞նչ կա, նայ՞ել եք․ Ամերիկայի ռազմական օգնությունը Ադրբեջանի ռազմական բյուջեի ինչքա՞ն մասն է, կարո՞ղ ա, օրինակ, ընդամենը 0,02 տոկոսը։ Մոտավոր տենց մի բան ա, մասնագետները հաստատ ավելի ստույգ կնշեն։ Դա որ դադարեց, և՞, դա ի՞նչ հարց է լուծում։ Ադրբեջանին ինտենսիվ զինում է Ամերիկայի արբանյակ Իսրայելը։ Ամերիկան Իսրայելին ինչի՞ չի ասում, զենք չտաս Ադբեջանին։ Բա թող դա դադարեցնի․ թե չէ՝ չնչին քայլը մեզ վրա հերոսություն որպես ծախում է, մենք էլ իրենց փայ միամիտը պետք ա լինենք, էլի։ Չնայած բա միամիտ ենք, բա ինչ ենք։ Այդ նույն Ամերիկան սաղ աշխարհին հորդորել-ստիպել ա, Ռուսաստանի դեմ պատժամիջոց են կիրառել, բա Ադրբեջանի դեմ էլ մի քիչ կիրառեք, օրինակ՝ պարտադրեք, թող սաղ բրենդերը դուրս գան այդ երկրից, իրենց նաֆթն ու գազը չառնեն, սաղ մասնաբաժինները սառեցրեք, ֆինանսավորումներն ու ներդրումները դադարեցրեք, էդ ձեր սաղ խոշոր ու ոչ միայն բիզնեսները փակեք բա․ ադրբեջանցիների՝ դրսում ունեցած հաշիվները սառեցրեք, վճարային համակարգերը սաղ անջատեք, ադրբեջանական սփյուռքի ներկայացուցիչների հաշիվները սառեցրեք, օրերով պահեք ու ստուգեք կապը տեռորիստական իշխանությունների հետ։ Թե չէ՝ նավթագազային ձեր ընկերոջը մի երկու կոպեկի օժանդակությունից զրկել եք, մեզ վրա լավություն եք ծախում, ոնց որ էն նոր աշխարհի աբորիգեններին, ապակու ու հայելու կտոր են տվել, տեղը վերցրել ոսկու հանքեր։
ԱՄՆ պետքարտուղարությունն ասում է՝ Հայաստանի «ինքնիշխանության և տարածքային ամբողջականության ցանկացած խախտում կբերի լուրջ հետևանքների»: Հայաստանի տարածքից 200 քառակուսի կիլոմետր օկուպացրել է թշնամին, ո՞ւր են լուրջ հետևանքները»: