«Տպավորություն է, որ որոշ մարդիկ կորցրել են չափի զգացումը». Զախարովա

Ամենշաբաթյա ճեպազրույցների ժամանակ ՌԴ ԱԳՆ ներկայացուցիչ Մարիա Զախարովան անդրադարձել է ՀՀ ԱԳ նախարար Արարատ Միրզոյանի հայտարարությանը, որի համաձայն՝ խաղաղության պայմանագրի վերաբերյալ ադրբեջանական առաջարկների մեջ որոշակի հետընթաց կա:

«Հետընթացի կամ առաջընթացի մասին գնահատական տալը այդ երկրի իրավունքն է: Ճիշտ կլինի մանրամասներ իմանաք մեր հայ գործընկերներից՝ որպես ինքնիշխան պետություն, որն իրավունք ունի սեփական գնահատականը տալ: Միգուցե, ինչ-որ կապ կա այդ հայտարարության և ամերիկացի բանագնացի այցի հետ»,- ասել է Զախարովան՝ նկատի ունենալով ԱՄՆ Պետդեպարտամենտի ավագ խորհրդական Լուիս Բոնոյի այցը:

Նա շարունակել է՝ նշելով, որ Ռուսաստանն ուշադրություն է դարձրել «Քաղաքացիական պայմանագիր» խմբակցության պատգամավոր Սարգիս Խանդանյանի հայտարարությանն այն մասին, որ Վաշինգթոնի և Բրյուսելի հարթակներում բանակցությունները միջազգային հեղինակություն ունեն, և դա դրանց լեգիտիմություն է հաղորդում:

«Տպավորություն է, որ նման հայտարարություն անող որոշ մարդիկ կորցրել են չափի զգացումը: Սա մեր՝ նման դիրքորոշումը չհասկանալու հարցը չէ, սա շատ կարևոր խնդիր է հենց Հայաստանի համար։ Վաշինգթոնն ու Բրյուսելը կամ ուղղակի կրկնօրինակում են եռակողմ պայմանավորվածությունները կամ փոխում են դրանք՝ իրենց շահերի համար: Ի՞նչ լեգիտիմության մասին ընդհանրապես կարելի է խոսել նման կեղծ միջնորդների հետ: Կոլեկտիվ Արևմուտքը՝ ի դեմս ԱՄՆ-ի, հրահրում է պատերազմներ, հակամարտություններ, կազմակերպում գունավոր հեղափոխություններ և բոլորին պարտադրում իր մտացածին կանոնները»,- ասել է Զախարովան: