Ադրբեջանական պատվիրակությունը դադարեցրել է իր գործունեությունը ԵԽԽՎ-ում

Ադրբեջանական պատվիրակությունը դադարեցրել է աշխատանքը Եվրոպայի խորհրդի խորհրդարանական վեհաժողովում (ԵԽԽՎ)՝ «իր լիազորություններին ուղղված մարտահրավերների պատճառով»։ Ադրբեջանական պատվիրակության հայտարարության մեջ ասվում է, որ 19 տարի՝ 2001-2020 թվականներին, ԵԽԽՎ-ն չի կարողացել պատասխանատվության կանչել «ագրեսոր պետությանը»՝ Հայաստանին իր գործողությունների համար, որոնք հակասում են Եվրոպայի խորհրդի հիմնական արժեքներին և սկզբունքներին։ Խոսքը, մասնավորապես, վերաբերում է էթնիկ զտումների ենթարկված ադրբեջանցի փախստականների և ներքին տեղահանվածների մարդու իրավունքների բացահայտ անտեսմանը։

«Ցավոք, ԵԽԽՎ-ն օգտագործվում է որպես հարթակ՝ հարձակվելու որոշ անդամ երկրների վրա։ ԵԽԽՎ-ի հիմնական սկզբունքներն օգտագործվում են որոշակի կողմնակալ խմբերի կողմից՝ իրենց նեղ շահերն առաջ տանելու համար։

ԵԽԽՎ-ում ադրբեջանական պատվիրակության լիազորությունները վիճարկելու նախաձեռնությունը մենք համարում ենք այս արատավոր արշավի մի մաս։ Մենք այս նախաձեռնությունը դիտարկում ենք նաև՝ որպես Ադրբեջանում ընթացող ընտրական գործընթացին անհիմն միջամտելու միտումնավոր և անընդունելի փորձ և մեր երկրում ժողովրդավարական ինստիտուտների գործունեությունը խաթարող նենգ գործողությունների վառ օրինակ։

ԵԽԽՎ-ում ձևավորված ռասիզմի, ադրբեջանաֆոբիայի և իսլամաֆոբիայի անտանելի մթնոլորտի պայմաններում ադրբեջանական պատվիրակությունը որոշում է դադարեցնել իր փոխգործակցությունն ու ներկայությունը ԵԽԽՎ-ում մինչև հետագա ծանուցումը»,- ասել են պատվիրակները։

Հայտարարության ընթերցումից հետո Ադրբեջանի պատվիրակությունը լքել է դահլիճը։