«Մեր պետության տարածքային ամբողջականությունը և ինքնիշխանությունը վտանգի տակ է». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Ադրբեջանի ագրեսիվ հռետորաբանությունը, Ռուսաստանի արհամարհական պահվածքը (Զախարովան՝ ամենօրյա ռեժիմով, Լավրովը՝ շաբաթական) Հայաստանի նկատմամբ մտածել են տալիս, որ մեր պետության (մոռացեք Նիկոլին, Սերժին, Քոչարյանին ու մյուսներին, հիշեք միայն ու բացառապես Հայաստանը) տարածքային ամբողջականությունը և ինքնիշխանությունը վտանգի տակ է:
Բաքուն անթաքույց երկու կետի վրա է հարվածում՝ Տավուշ և Սյունիք, այն է՝ անկլավներ և միջանցք: Ռուսաստանին միջանցքն այնքան անհրաժեշտ է, որ Մոսկվան ամենակոպիտ ձևով արհամարհում է իր երբեմնի ռազմավարական դաշնակցի շահերը: 2020-ի նոյեմբերի 9-ի տեքստի գլխավոր թեման՝ Արցախը զավթվել ու հայաթափվել է, բայց Լավրովը շարունակում է հիշեցնել այդ տեքստի 9-րդ կետը միայն՝ միջանցքը:
Մղձավանջային այս պայմաներում մեզ լուծումներ են պետք կամ ռուս-ադրբեջանական սպառնալիքի չեզոքացում, հետաձգում, մինչև տարածաշրջանում ինչ-որ բան փոխվի, Հայաստանում ինչ-որ բան փոխվի, ռազմական հավասարակշռություն փոխվի:
Այս պահին մեր կոկորդից են բռնել:
Ինչքան էլ ընդդիմությունը, նախկին ընդդիմությունը, նախկին իշխանությունը և մյուսները շարունակեն քննադատել գործողներին, նրանց մեղադրեն թուրք-ադրբեջանական օրակարգը սպասարկելու համար (քննադատները Ռուսաստանին բարեկամաբար խնայում են, չեն տեսնում նրա թաքուն, այս դեպքում՝ բացահայտ ձեռքը) և ծանրագույն այլ մեղադրանքներ ներկայացնեն, Հայաստանի ապագայի պատասխանատուն հենց գործող իշխանություններն են, հետևաբար՝ նրանք պետք է համակերպվեն մեղադրանքների հետ, անտեսեն դրանք և կենտրոնանան բացառապես լուծումների վրա, այդ թվում և առաջին հերթին՝ նոր պատերազմի չեզոքացման վրա:
Հայաստանի գործող իշխանությունները պետք է պահեն Ադրբեջանի և Թուրքիայի հետ երկխոսության բոլոր խողովակները, հատկապես՝ Անկարայի հետ: Փաշինյանին և ՔՊ-ին քննադատող որևէ գործիչ չի զոհվելու միջանցքի կամ անկլավների համար ճակատամարտում, նրանց երեխաները չեն զոհվելու:
Եթե Հայաստանը կարողանա առաջիկա տարիներին պահել 29.800 քառակուսի կմ տարածքը և իր անկախությունը, ապա դա կլինի զարմանահրաշ նվաճում: 1920-ի օգոստոսին ոչ ոք չէր կանխատեսում, որ կկորցնենք Հայաստանի կեսը, իսկ մյուս կեսը կդառնա բոլշևիկյան ու Ռուսաստանի մաս փաստացի: 2020-ի օգոստոսին, ոչ ոք կամ գրեթե ոչ ոք չէր պատկերացնում, որ կկորցնենք Հադրութը, Շուշին, Արցախի հարակից շրջանները, ապա ամբողջ Արցախն ու այդ հողի հազարամյա տիրոջը»: