«Պատրաստ ենք աջակցել Երևանի առաջարկած ինտեգրման ուղիներին». Միշուստին

Մոսկվան պատրաստ է աջակցել Եվրասիական տնտեսական միության շրջանակներում ինտեգրման հետագա զարգացման առաջնահերթություններին, որոնք առաջարկել է Երևանը, քանի որ դրանք շատ առումներով համընկնում են ռուսականի հետ: Այս մասին հայտարարել է ՌԴ վարչապետ Միխայիլ Միշուստինը:

Ավելի վաղ ՀՀ վարչապետ Նիկոլ Փաշինյանը վստահություն է հայտնել, որ ընդհանուր շուկայի ստեղծումը ԵԱՏՄ բոլոր անդամներին կտա բազմաթիվ կարևոր առավելություններ, կնպաստի միավորման երկրների տնտեսությունների կայուն զարգացմանը, նրանց բնակչության բարեկեցության բարձրացմանը, ինչպես նաև էներգետիկ անվտանգության ամրապնդմանը:

Միշուստինը նշել է, որ ռուսական կողմն ուշադիր ուսումնասիրել է ԵԱՏՄ ինտեգրման զարգացման առաջնահերթությունները, որոնք տրամադրել են հայկական կողմը և վարչապետ Փաշինյանը:

«Դրանք շարունակական են և շատ առումներով համընկնում են ռուսական կողմի դիրքորոշման հետ։ Պատրաստ ենք համակողմանի աջակցություն ցուցաբերել դրանց իրականացման համար»,- հավելել է Միշուստինը՝ Եվրասիական միջկառավարական խորհրդի ընդլայնված կազմով նիստի ժամանակ: