Երկուշաբթի, 23 փետրվարի, 2026 թ.
|
Ստեփանակերտում`   +9 °C

«Հայաստանում ոչինչ չի ստացվում, որովհետև դեռ չի սաղմնավորվել ՀԱԿԱԷԼԻՏԱՆ». Արա Պողոսյան

«Հայաստանում ոչինչ չի ստացվում, որովհետև դեռ չի սաղմնավորվել ՀԱԿԱԷԼԻՏԱՆ». Արա Պողոսյան
148
Չորեքշաբթի, 13 մարտի, 2024 թ., 00:24

Քաղաքագետ Արա Պողոսյանի ֆեյսբուքյան գրառումը. «Էլիտայի այլասերումը սկսվում է այն պահից, երբ կարծում է, որ ինքը առավել է բոլորից և ժողովուրդը պարտք է իրեն իր կատարած ծառայությունների համար։
Այս գիտակցմանը հաջորդում է ինքնապարուրումը սեփական մեկուսացվածության մեջ՝ դառնալով «փակ» տիպի էլիտա։
Այն սկսում է անընդհատ հեռանալ իր հենարանից՝ ժողովրդից, և աստիճանաբար ժողովուրդն ու էլիտան իրար դառնում են օտար, հետո՝ թշնամի։
Այս փուլում էլիտան կարծում է, որ իսկական ժողովուրդը հենց իր կողքի մարդիկ են և սկսում է տենչալ ոչնչացնել մնացածին՝ ժողովրդին։
Ժողովուրդն ստիպված է լինում առաջ բերել «հակաէլիտային»։ Հակաէլիտան ժողովրդի առաջին շարքերից դուրս եկած նոր «ընտրասերվածներն» են, ովքեր կամ կապացուցեն, որ իրենք կենսունակ են և ունեն ժողովրդական հենարան, կամ կոչնչացվեն (19-րդ դարում նրանց կգլխատեին կամ կախաղան կհանեին, իսկ հիմա կոչնչացնեն բարոյապես, հոգեպես, և իհարկե գուցե ֆիզիկապես։ Սա հատուկ գրում եմ, որպեսզի յուրաքանչյուր խելապակաս իրեն առաջ չնետի)։
Հակաէլիտան չի կարող ունենալ հիվանդություններ ինչպես էլիտան, կամ դրանց չնչին մասն անգամ, որովհետև կպարտվի։ Հակաէլիտան պետք է լինի առողջ «սաղմ», որը կյանք կտա նոր ու կենսունակ համակարգի։ Եվ միայն այդ դեպքում տեղի կունենա բնական փոփոխություն՝ «բնության մեջ թույլ և ծեր տեսակները պարտվում են նոր ու երիտասարդ տեսակներին՝ ապահովելով բնական սելեկցիայի շարունակականությունը»:
Էլիտան կպարտվի հակաէլիտային և կծնվի նոր Էլիտան։ Նոր էլիտան ևս զերծ չի մնա բնական փոփոխությունների վերը նշված ցիկլից։
Հայաստանում ոչինչ չի ստացվում, որովհետև դեռ չի սաղմնավորվել ՀԱԿԱԷԼԻՏԱՆ»:

Աղբյուրը`   Արա Պողոսյան