«ՆԱՏՕ-ն ռեգիոնում առանցքային «զրուցակից» դիտարկում է Ադրբեջանին». Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Դատելով ՆԱՏՕ-ի գլխավոր քարտուղարի՝ Կովկաս այցի վերաբերյալ ՆԱՏՕ-ի պաշտոնական հաղորդագրությունից, Սթոլթենբերգի այցն ունի մի ուշագրավ դետալ:
Հայաստանում ու Վրաստանում նա հանդիպելու է վարչապետների և նախագահների հետ: Դե, սա պայմանավորված է կառավարման մոդելներով, որ ունեն Հայաստանն ու Վրաստանը: Ադրբեջանում Սթոլթենբերգը հանդիպելու է նախագահի հետ, վարչապետը, բնականաբար, ցածր կարգավիճակ է և երկրորդ հանդիպումը լինելու է արտգործնախարարի հետ: Բայց ուշագրավ դետալը դա չէ, այլ այն, որ Բաքվում նախատեսված է նաև երրորդ հանդիպում՝ պաշտպանության նախարարի հետ:
Համենայն դեպս, ըստ պաշտոնական հաղորդագրության, ծրագրված չէ Հայաստանում և Վրաստանում այդպիսի հանդիպում:
Ուրեմն ինչո՞ւ է ՆԱՏՕ-ի գլխավոր քարտուղարն Ադրբեջանի պարագայում «խախտում» բալանսը: Իհարկե, այստեղ յուրաքանչյուրը կարող է անել իր դիտարկումը:
Իմ սուբյեկտիվ գնահատմամբ, այդ հանգամանքը պայմանավորված է նրանով, որ ՆԱՏՕ-ն ռեգիոնում առանցքային «զրուցակից» դիտարկում է Ադրբեջանին, ինչը առաջին հերթին պայմանավորված է ուժերի բալանսով: Բայց, ոչ միայն դրանով: ՆԱՏՕ-ի համար Ադրբեջանը Ռուսաստանի և Իրանի դեմ, դրանց զսպման, ինչպես նաև այդ համատեքստում դեպի Կասպիցի ավազան, ու նաև արդեն աշխարհաքաղաքական ավելի լայն համատեքստում դեպի Կենտրոնական Ասիա «կամուրջն» է:
Ընդ որում, այնպես չէ, որ Ադրբեջանի համար դա «մանանա» է, կամ, համենայն դեպս, «մանանայի» ռազմավարական պաշար: Իհարկե, սա էլ իր հերթին ինքնաբերաբար չի նշանակում, որ, եթե մի բան «մանանա» չէ Բաքվի համար, ուրեմն «մանանա» է մեզ համար: Ոչ, չխառնենք այստեղ խնդիրները: Հակառակը, մեզնից այսօր առավել քան երբևէ պահանջվում է բուն և պատկերավոր, փոխաբերական, ներքին ու արտաքին ընդգրկուն իմաստով՝ մեկ առ մեկ զատել որոմը սերմից:
Առավել ևս, որ խորհրդանշաբար՝ Միջինքն անցել ենք և մոտենում ենք Սուրբ Զատկին է»։