«Հանձնվող տարածքներում հայեր չեն ապրում, տներ չկան»․ Վահե Ղալումյան

«ՀՀ 29 800 քառ․ կմ-ից որևէ հատված տալու մասին խոսք չկա»,- այսօր ԱԺ-ում լրագրողների հետ ճեպազրուցի ժամանակ ասել է ՔՊ-ական պատգամավոր Վահե Ղալումյանը՝ հավելելով, որ Ադրբեջանի կողմից պահանջվող Տավուշի 4 գյուղերը նախկինում ադրբեջանական գյուղեր են եղել։ «Տավուշի մարզից էլ կան հողեր, որ Ադրբեջանի տիրապետության տակ են, սահմանագծման և սահմանազատման հանձնաժողովի խնդիրն է՝ խոսել, թե այդ հողերն ի՞նչ պետք է լինեն։ Նիկոլ Փաշինյանի կողմից նշված 31 գյուղերը դրանք գյուղերի մասեր են, հանդեր ու խոտհարքեր են, իսկ այս 4 գյուղերը ադրբեջանական բնակեցված գյուղեր են եղել։ Հանձնվող տարածքներում ոչ մի հայկական բնակարան չկա, այնտեղ հայեր չեն ապրում, տներ չկան, եթե լինեն էլ՝ հատուկենտ, որոնք պետության աջակցությամբ լուծում կստանան։ Սա խաղաղության գործընթացի մի մաս է, պետք է գնալ լուծումների և մեկընդմիշտ հարցը լուծել»,- ասել է պատգամավորը։