«Ադրբեջանի հաղթանակը Թուրքիայի վրայից ջնջեց Բորալթանի ողբերգության բիծը»․ Էրդողան

Թուրքիայի կողմից 44-օրյա պատերազմում Ադրբեջանին ցուցաբերած մեծ աջակցությունը թույլ տվեց ոչ միայն «ազատագրել պատմական ադրբեջանական հողերը», այլ Թուրքիայի վրայից ջնջել 1944թ․ Բորալթանի ողբերգության ամոթալի հետքը։ Այս մասին կառավարության նիստի ժամանակ ասել է Թուրքիայի նախագահ Ռեջեփ Էրդողանը։

176 ադրբեջանցիների գնդակահարումն Էրդողանը «ողբերգություն» է անվանել, որում, նրա խոսքով, մեղավոր էր այդ ժամանակ իշխանության ղեկին գտնվող Թուրքիայի Ժողովրդա-հանրապետական կուսակցությունը։

Նշենք, որ 1944թ․ 176 ադրբեջանցիներ՝ փախչելով ստալինյան բռնաճնշումներից, փորձել են Բորալթան կամրջով անցնել Թուրքիա՝ ապաստան ստանալու ակնկալիքով, սակայն գնդակահարվել են թուրքերի աչքի առաջ։