«Փաշինյանն այս վիճակի հաղթահարման կարողություն չունի»․ Լևոն Զուրաբյան

ՀԱԿ փոխնախագահ Լևոն Զուրաբյանը ֆեյսբուքյան իր էջում տեսանյութ է հրապարակել՝ կից գրառմամբ․ «Խաղաղության հաստատումը Վաշինգտոնում Բլինքեն֊Միրզոյան֊Բայրամով հանդիպման արդյունքում անհնար է, ինչպես և կանխատեսեցի։ Այդ կանխատեսումն այդքան էլ դժվար բան չէր։ Ադրբեջանը ոչ մի շահագրգռություն չունի խաղաղություն ստորագրելու, որովհետեւ նրա նկատմամբ ոչ մի ճնշման միջոց չի կարող կիրառվել, իսկ Բայդենի վարչակազմը հունիսի 27֊ի Թրամփ֊Բայդեն բանավեճից հետո կաթվածահար վիճակում է, ինչպես և ամբողջ Դեմոկրատական կուսակցությունը։
Փաշինյանի կառավարությունը, ուշացումով հասկանալով, որ իր միակողմանի խաղադրույքը Արևմուտքի վրա վտանգի տակ է դրել Հայաստանի ապագան, փորձում է ինչ֊որ շտկումներ մտցնել իր կուրսի մեջ, բայց դրանք արդյունք չեն տալու, եթե չհաղթահարվի մեր քաղաքականության միակողմանիությունը և Հայաստանը շարունակի անտեսել պայմանականորեն ասած «ԲՌԻԿՍ» համաշխարհային նոր միավորումը։
Շանհայի համագործակցության կազմակերպությունում ունենալով Ադրբեջանին հավասար՝ Երկխոսության Գործընկերոջ կարգավիճակ, Փաշինյանն ընդհանրապես չմասնակցեց Ղազախստանում կայացած այդ ֆորումին, որտեղ հավաքվել էին Չինաստանի, Ռուսաստանի, Հնդկաստանի, Իրանի, Պակիստանի, Թուրքիայի եւ միջինասիական հանրապետությունների ղեկավարները, որոնց հետ Հայաստանը իրականում քննարկելու բազմաթիվ հարցեր պետք է ունենար։
Տպավորություն է ստեղծվում, որ Փաշինյանի արտաքին քաղաքականության քարտեզում գոյություն ունեն միայն Ամերիկան և Եվրոպական Միությունը՝ Խորվաթիայից մինչև Լյուքսեմբուրգ, որոնց վրա է ծախսվում մեր դիվանագիտական ջանքերի առյուծի բաժինը։ Այս ամենը այլ կերպ անվանել, քան աշխարհի կեսից ինքնամեկուսանալու անմեղսունակ մի քաղաքականություն (այն էլ այնպիսի կեսից, որը մեր ամենակարևոր տնտեսական գործընկերներ լինելու ներուժն ունի), հնարավոր չէ։
Հայաստանը դարձել է մեկ հարցի երկիր. արդյո՞ք և արդյոք ե՞րբ Ադրբեջանը կհարձակվի Հայաստանի վրա։ Այս վիճակի հաղթահարման որևէ ռազմավարություն կամ կարողություն Նիկոլ Փաշինյանը չունի»։