«Բայդենը փաստորեն «երաշխավորու՞մ» է Թրամփի հաղթանակը»․ Հ․ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Ամերիկյան Պոլիտիկո պարբերականը, որը ունի պետքարտուղարության «արտահոսքերի» հարթակի համբավ, օրերս հրապարակել էր մի բավականին հետաքրքիր տեղեկություն:

Գրել էին, որ սոցհարցման տվյալով, փոխնախագահ Կամալա Հարիսն ու նախկին պետքարտուղար Հիլարի Քլինթոնը իրենց վարկանիշով ավելի բարձր են Թրամփից, ի տարբերություն Բայդենի: Հարիսն, ըստ հրապարակման, ուներ 42 տոկոսի հավանություն՝ ի տարբերություն Թրամփի 41-ի, իսկ Քլինթոնը՝ 43 տոկոսի հավանություն:

Բայց, ինչպես հայտնի է, Բայդենը հրաժարվում է դուրս գալ ընտրապայքարից, ինչի անհրաժեշտության մասին բավականին բաց խոսել էին հենց դեմոկրատական շրջանակները՝ Տրամպի հետ առաջին ու տապալված բանավեճից հետո:

Բայդենը դարձյալ հայտարարել է, որ չի հանի թեկնածությունն ու կհաղթի: Ավելին, նույնիսկ կարծես թե անուղղակի հակադրվել է դեմոկրատներին, ասելով, որ եվրոպացի առաջնորդներն են իրեն հորդորում մնալ ու հաղթել:

Փաստացի ստացվում է, ըստ Պոլիտիկոյի, որ Հարիսը կամ Հիլարին ունեն Թրամփին հաղթելու շանս, ի տարբերություն բոլոր առումներով տապալվող Բայդենի: Բայց, Բայդենը հրաժարվում է հանել իր թեկնածությունը: Հետևաբար, ունե՞նք հիմք եզրակացության կամ գոնե ենթադրության, կամ նվազագույնը՝ հարցի, որ մնալով ընտրապայքարում, Բայդենը փաստորեն «երաշխավորու՞մ» է Թրամփի հաղթանակն ԱՄՆ նախագահի ընտրությանը:

Որովհետև, բոլոր ցուցիչները վկայում են, որ միայն ֆորս-մաժորը կարող է խանգարել այդ հաղթանակին»: