«Արևմուտքը պարտադրելու է Նիկոլ Փաշինյանին՝ ընդունել Բաքվի հրավերը»․ Զոհրաբյան

Հասարակական-քաղաքական գործիչ Նաիրա Զոհրաբյանը «Հայելի» ակումբում անդրադարձել է Փաշինյանի՝ COP29-ին մասնակցելու Ադրբեջանի հրավերին․ «Երեկ տեղի ունեցավ այն, ինչի մասին խոսվում էր երկար ժամանակ: Ալիևի՝ արտաքին հարցերով պատասխանատուն պաշտոնապես Նիկոլ Փաշինյանին հրավիրեց նոյեմբերին այցելել Բաքու՝ մասնակցելու ՄԱԿ-ի կլիմայի հերթական համաժողովին: Ինչո՞վ է ռիսկային, ինչո՞վ է վտանգավոր սա: Ակնհայտ է, որ Նիկոլ Փաշինյանը ընդունելու է Բաքվի հրավերը, որովհետև Նիկոլ Փաշինյանը ոչինչ չի որոշում: Արևմուտքը պարտադրելու է Նիկոլ Փաշինյանին՝ ընդունել Բաքվի հրավերը: Ենթադրվում է, որ Բաքվում կստորագրվի նաև Հայաստան-Ադրբեջան որևէ հայտարարության տեքստ, որտեղ նախանշված կլինեն խաղաղության պայմանագրի հիմնական սկզբունքները և դրույթները: Այսինքն, կստորագրվի Հայաստանի հերթական կապիտուլյացիայի ևս մեկ թուղթը: Ի՞նչ դեպքում Նիկոլ Փաշինյանը կարող է ընդունել Բաքվի հրավերը: Եթե Նիկոլ Փաշինյանը ունենա այնքան դուխ և քաղաքական արժանապատվություն, պայման կդնի Բաքվի առջև՝ ասելով, որ նոյեմբերին Բաքու կգնա միայն մի դեպքում, եթե իր հետ նույն ինքնաթիռով Բաքվից Երևան վերադարձնի ռազմագերիներին, բոլորին, որոնք որպես քաղաքական հալածյալներ և քաղաքական պատանդներ պահվում են Բաքվի բանտում»,-ասաց Զոհրաբյանը: