«Ինչո՞ւ է նվազել Հայաստան այցելողների թիվը»․ Հակոբ Բադալյան

Քաղաքական մեկնաբան Հակոբ Բադալյանի գրառումը․ «Ռուսաստանի պաշտոնական վիճակագրության տվյալով, 2024 թվականի առաջին կիսամյակում Հայաստան եկող ռուսաստանցիների թիվը նվազել է 17 տոկոսով, կամ գրեթե 90 հազար մարդով:
Այլ կերպ ասած, Հայաստանի տնտեսության համար կարևոր զբոսաշրջային ուղղությունը «կորցրել» է 90 հազար մարդ: Եթե միջինացված գնահատենք, որ ամեն մարդ Հայաստանում կծախսեր 500 դոլար՝ իսկ ռուսաստանցի զբոսաշրջիկները այսպես ասած «ծախոսող» զբոսաշրջիկներ են, ապա կստացվի, որ Հայաստանի զբոսաշրջային բիզնեսը չի ստացել 45 միլիոն դոլար, որ կարող էր ունենալ, եթե ռուսաստանցի այցելուների թիվը թեկուզ չավելանար, այլ միայն՝ չնվազեր:
Ընդ որում, սա իհարկե շատ մոտավոր ու կոպիտ հաշվարկ է, որը չի ներառում նաև մուլտիպլիկատիվ էֆեկտը:
Փոխարենը, նույն ժամանակահատվածում էապես ավելացել է ռուսաստանցիների այցը Վրաստան և Ադրբեջան:
Ինչո՞ւ է նվազել Հայաստան այցելողների թիվը: Սա թերևս պետք է լինի ոլորտային մասնագետների ուսումնասիրության առարկան: Հրապարակային առումով, հնարավոր է, որ առնվազն մի հանգամանք նպաստել է նվազմանը՝ ՄԻՐ վճարային քարտերի արգելումը Հայաստանում: Կա՞ն այլ պատճառներ: Կրկնեմ, սա թերևս պետք է ուսումնասիրեն մասնագետները և առաջին հերթին ոլորտի պետական քաղաքականության պատասխանատուները:
Որովհետև, այսպես ասած՝ ներքաղաքականությունը ներքաղաքականություն, բայց Հայաստանի պետական կենսունակության և դիմադրունակության հիմքը տնտեսությունն է: Հայաստանի տնտեսության համար զբոսաշրջությունը կարևոր ոլորտ է, հետևաբար այդ ոլորտում արդյունք գեներացնելու ամենափոքր հնարավորությունն անգամ պետք է լինի կարեւոր, հետևաբար՝ կարևոր պետք է լինի փոքր կորուստ անգամ թույլ չտալը:
Իսկ ռուսաստանյան այցելուները զբոսաշրջային ոլորտի համար կարևոր ռեսուրս են, անգամ այնպիսի պետություններում, որոնք իրենց տնտեսական հնարավորություններով բազմակի գերազանցում են Հայաստանին»։