«Բելառուսը չի կարող Հայաստանում դեսպանատուն ունենալ»․ Արման Բաբաջանյան

«Հանուն հանրապետության» կուսակցության նախագահ Արման Բաբաջանյանը գործընկերների հետ բողոքի ակցիա են իրականացրել Բելառուսի դեսպանատան դիմաց՝ պահանջելով փակել այն ՀՀ-ում։

«Բելառուսը ոչ միայն հիմա է անհարգալից վերաբերմունք ցուցաբերում մեր ժողովրդի, մեր պետության նկատմամբ, այլև այս պետությունը մասնակցել է 2020թ․ պատերազմի նախապատրաստությանը։ Որևէ պետություն, եթե ներկայացնում է ազգային անվտանգության սպառնալիք, նրա հետ մենք չենք կարող ունենալ դիվանագիտական հարաբերություններ։ Դա ինքնին արդեն հիմք է, որպեսզի մենք սկսենք գործընթաց և դադարեցնենք այս բռնապետական ռեժիմի հետ մեր հարաբերությունները, որովհետև այն պետությունը, ում հետ մենք չենք կիսում ընդհանուր արժեքներ և նպատակներ, մենք նրանց չենք կարող թույլ տալ մեր երկրում դիվանագիտական ծառայություն ծավալել։ Հայաստանին արտաքին քաղաքական գերատեսչության առաջին արձագանքը պետք է լինի մեր այս ակցիային և հայտարարությանը և քաղաքական ուժերի հորդորին՝ անմիջապես հրավիրել դեսպանին արտգործնախարարություն և խորհուրդ տալ նրան վերադառնալ Մինսկ՝ խորհրդատվության։ Բելառուսը չի կարող Հայաստանում ունենալ դեսպանատուն»,-ասել է ԱԺ նախկին պատգամավոր Արման Բաբաջանյանը։
Ակցիայի մասնակիցները ձու, լոլիկ ու կարտոֆիլ են նետել դեսպանատան դռների ուղղությամբ։