«Վրաստանի խորհրդարանի ընտրությունը շատ կարևոր նշանակություն կունենա Կովկասի համար»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Հոկտեմբերին Վրաստանի խորհրդարանի ընտրությունն իսկապես շատ կարևոր նշանակություն կունենա Կովկասի համար: Ավելին, ըստ երևույթին այդ ընտրության արդյունքը շատ ավելի մեծ նշանակություն կունենա Կովկասի համար, քան նոյեմբերին կայանալիք ԱՄՆ նախագահի ընտրությունը: Սա իհարկե ասում եմ մի փոքր հարաբերականությամբ, որովհետև մեծ հաշվով իհարկե ԱՄՆ դիրքորոշումն է լինելու Վրաստանում իրադարձությունների առանցքային կատալիզատորներից մեկը, հետևաբար՝ կախված դիրքորոշումից, ձեավորվելու է նաև քաղաքական արդյունքը:

Այդ իմաստով, վերստին ուշադրություն եմ հրավիրում ոչ անհայտ Ջեյմս Օ Բրայանի այն հայտարարությանը, որ արել էր Կոնգրեսում՝ Միջին միջանցքի հետ կապված: Օ Բրայանը ասել էր, որ կա իհարկե Վրաստանի ճանապարհը, սակայն իրենք Միջին միջանցքի հիմնական երթուղի դիտարկում են Ադրբեջան-Հայաստան-Թուրքիան:

Սա իհարկե ունի մի քանի պատճառահետևանքային շերտ: Եվ այստեղ հարց կարող ենք տալ, արդյո՞ք դրանցից մեկն էլ այն չէ, որ ԱՄՆ կամ դիտարկում է Վրաստանի «կորուստ», կամ դիտարկում է Վրաստանի բավական տևական անկայունություն:

Հետևաբար, այստեղից էլ կարող ենք եզրակացնել, որ Վրաստանում խորհրդարանի ընտրության միջավայրն ու հետագա զարգացումները որոշակիորեն կախված են նաև այն հանգամանքից, թե որքան մոտ կարող է լինել Ադրբեջան-Հայաստան-Թուրքիա երթուղին:

Այստեղ է նաև Պուտինի Բաքու այցի նպատակներից և Ալիևի ակնկալիքներից առանցքայիններից մեկը՝ չպայմանավորվել այդ երթուղու հարցում, չընդունել ԱՄՆ առաջարկները, որովհետև այդ երթուղու բացակայությունը այդուհանդերձ լինելու է Վրաստանի հարցում ԱՄՆ-ին որոշակի կաշկանդող գործոն, հաշվի առնելով, որ այդ պարագայում Վրաստանում անկայունությունը կփակի Միջին միջանցքի նույնիսկ այդ «երակը», ինչը կլինի լուրջ խնդիր Եվրոպայի համար»: