«Ես հրաժարվում եմ այդ միջոցառմանը մասնակցելուց». ԱԺԲ անդամ

Ազգային-ժողովրդավարական Բևեռի անդամ Կառա Չոբանյանը նախօրեին ֆեյսբուքյան իր էջում գրել է. «Այսօրվա հավաքի վերջում Բագրատ սրբազանը հայտարարեց, թե սեպտեմբերի 2-ն Արցախի անկախության օրն է, և միջոցառում է լինելու եկեղեցու բակում։ Ցավում եմ, որ Արցախի հարցը Հայկական հարցի մաս համարող սրբազանը դեռ չի հանգել այն եզրակացությանը, որ հենց Արցախի անկախության կեղծ թեզն ու քաղաքականությունն են Արցախի կորստի և մեր այսօրվա աղետալի վիճակի պատճառը։ Որպես Արցախի միացման կողմնակից և Արցախը Հայաստանի անբաժանելի մաս համարող՝ ես հրաժարվում եմ այդ միջոցառմանը մասնակցելուց և հորդորում եմ գաղափարակից ընկերներիս նույնպես չմասնակցել։ Այդ սև սեպտեմբերի երկուսը չի կարելի մոռանալ, բայց մենք դա պիտի հիշենք որպես արհավիրքի օր՝ զուտ դասեր քաղելու և նման սխալներ չանելու համար, ոչ թե միջոցառումներով նշելու։ Գուցե սրբազանի համար այդ օրը պարզապես առիթ է ևս մի անգամ Արցախը հիշելու, բարձրաձայնելու, որ մենք չենք հրաժարվում Արցախից, բայց դրա մասին բարձրաձայնելու այլ առիթներ կարելի է գտնել, ոչ թե աղետի օրը տոնական միջոցառումով նշել»: