Աշտարակի խճուղում ԱԱԾ-ի կեղծ համազգեստով առևանգել են ԱՄՆ-ում հայտնի բիզնեսմենի կնոջը

Սեպտեմբերի 4-ին Ազգային անվտանգության ծառայության կեղծ համազգեստով առևանգում է տեղի ունեցել Երևանում, հայտնում է ֆոտոլրագրող Գագիկ Շամշյանը:

Ըստ աղբյուրի՝ ժամը 12։10-ի սահմաններում Աշտարակի խճուղում գործող San Marco լողավազանի մոտ 2 անձ, ովքեր կրել են Ազգային անվտանգության տարբերանշանով հագուստ, մոտեցել են Երևանի բնակչուհի 55-ամյա Լուսինե Մ-ին, ներկայացել են՝ որպես ԱԱԾ աշխատակիցներ և նրան BMW մակնիշի ավտոմեքենայով տեղափոխել են անհայտ ուղղությամբ։

Բարեկամները կարճ ժամանակ անց ճշտել են, որ այդ 2 քաղաքացիներն առևանգել են Լուսինե Մ-ին և ահազանգել են ՀՀ ՆԳՆ։

Աղբյուրի տեղեկություններով՝ առևանգվածն ԱՄՆ քաղաքացի է, նրա ամուսինը նույնպես ԱՄՆ քաղաքացի է և Միացյալ Նահանգներում հայտնի բիզնեսմեն է, և կա վարկած, որ առևանգողները շատ լավ տեղեկացված են նրանց ընտանիքի մասին։

Նշվում է, որ Լուսինե Մ․-ին առևանգել են այն ժամանակ, երբ նա փորձել է նստել իր ավտոմեքենան։ Նշված լողավազանի տարածքում հայտնաբերվել է առևանգվածի BMW X5-ը։