«Հնարավոր է, որ հայտարարությունն ունի տողատակային իմաստ»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «ՄԱԿ ԳԱ ամբիոնից Ֆրանսիայի նախագահի հայտարարությունը, որ Հայաստանը գտնվում է ադրբեջանական նկրտումների և ճնշման ներքո, ըստ էության հաստատում է վերը հիշատակածս գրառման տրամաբանությունը, որ արել էի նախօրեին: Ֆրանսիայի նախագահը Հայաստանի՝ ճնշման տակ գտնվելու մասին է ազդարարում Էրդողանի հետ Փաշինյանի հանդիպումից հետո, և էականը՝ Բլինքենի միջնորդությամբ Միրզոյան-Բայրամով հանդիպումից առաջ: Իհարկե Մակրոնը հայտարարում է, որ Հայաստանի վարչապետի կողքին է, սակայն այդ հայտարարությունն ըստ էության արվում է մի պարագայում, երբ նա Նիկոլ Փաշինյանի հետ վերջին անգամ շփվել է հուլիսին Լոնդոնում, և առ այսօր որևէ տող չկա Նիկոլ Փաշինյանին Հայաստանի Անկախության տոնի առիթով հղված Մակրոնի շնորհավորանքից, որևէ հանրային տող: Դա նշանակում է, որ չկա նաև շնորհավորանք:

Այս պայմաններում, երբ Ֆրանսիայի նախագահը հայտարարում է, որ Հայաստանի վարչապետի կողքին է, ստանում է բավականին բազմիմաստ նշանակություն: Մի կողմից դա նշանակում է, որ Ֆրանսիան չի հրաժարվելու Հայաստանի միջոցով Կովկասում դեր ունենալու իր հավակնությունից և ջանքից, անգամ, եթե Հայաստանի վարչապետը բավարար չընդառաջի դրան: Մյուս կողմից հնարավոր է, որ Մակրոնի այդ հայտարարությունն ունի տողատակային իմաստ, որ ինքը ըմբռնումով է մոտենում Թուրքիային հաճոյանալու Նիկոլ Փաշինյանի մոտեցմանը:

Բոլոր դեպքերում, էականն այն է, որ Մակրոնը փաստորեն Էրդողան-Փաշինյան հանդիպումից հետո, և Բլինքեն-Միրզոյան-Բայրամով հանդիպումից առաջ ըստ էության ահազանգում է Հայաստանի՝ ճնշման տակ լինելու մասին:

Իհարկե, խոսում է, որ Հայաստանն Ադրբեջանի ճնշման տակ է: Բայց, հարց է առաջանում, ինչո՞ւ է այդպես: Որովհետև «միջազգային հանրությունը» առ այսօր չի կարողացել ստեղծել վիճակ, որ չլինի այդպես և լինի հավասարակշռված գործընթաց: Իսկ «միջազգային հանրություն» ասելով Ֆրանսիայի նախագահը թերևս առաջին հերթին նկատի ունի ԱՄՆ: Եվ այն, որ Բլինքեն-Միրզոյան-Բայրամով հանդիպումից առաջ նա անում է այդ ահազանգը, կնշանակի, որ այդ հանդիպումը Ֆրանսիան իր համար դիտարկում է մարտահրավեր:

Եվ այստեղ հարց է առաջանում, իմ գնահատմամբ իհարկե հռետորական՝ ի՞նչ է այդ հանդիպումը Հայաստանի համար, եթե մարտահրավեր է Ֆրանսիայի համար»: