Երեքշաբթի, 21 ապրիլի, 2026 թ.
|
Ստեփանակերտում`   +8 °C

«Սայլակին գամված 100-ամյա քաղաքացին փոստով քվեարկել է Քամալա Հարիսի օգտին»․ Հակոբ Բադալյան

«Սայլակին գամված 100-ամյա քաղաքացին փոստով քվեարկել է Քամալա Հարիսի օգտին»․ Հակոբ Բադալյան
132
Հինգշաբթի, 17 հոկտեմբերի, 2024 թ., 14:42

Քաղաքական մեկնաբան Հակոբ Բադալյանը թելեգրամյան իր էջում տեսանյութ է հրապարակել՝ կից գրելով․ «Տեսանյութում, սայլակին պառկած մարդը ԱՄՆ նախկին նախագահ Ջիմմի Քարտերն է՝ 100 տարեկան: Օրեր առաջ նա այսպես տեսա և լուսանկարվել էր իր ընտանիիքի, թոռների ու ծոռների շրջանակում: Այսօր նրա թոռը հայտարարել է, որ 100-ամյա պապը փոստով քվեարկել է Քամալա Հարիսի օգտին: ԱՄՆ ընտրակարգում հնարավոր է բուն ընտրության օրից ավելի քան մեկ ամիս առաջ քվեարկել նաև փոստով: Սա է այն մեխանիզմը, որով Քամալա Հարրիսը կդառնա ԱՄՆ նախագահ։

Փոստով քվեարկության այդ հանգամանքը թերևս ամենից էականն է լինելու ԱՄՆ նախագահի ընտրության արդյունքի հարցում, ավելի շուտ՝ արդյունքը հաշվելու հարցում՝ փոստով քվեարկությունները: Մեծ հաշվով, նախորդ ընտրությանը հենց դրանք որոշեցին Բայդենի հաղթանակը Տրամպի հանդեպ: Գրեթե չկա կասկած, որ նույնը լինելու է նաև այս ընտրությանը, արձանագրելով Հարրիսի հաղթանակը Տրամպի հանդեպ:

Տվյալ պարագայում բուն ինտրիգը, կապված ԱՄՆ նախագահի ընտրության հետ, թերևս հետևյալն է՝ Տրամպը այդ դեպքում կտանի՞ իրավիճակը հետընտրական պայքարի, թե՞ ոչ: Եվ նրան հենց դրանից հետ պահելուն են միտված «մահափորձերը» և անգամ դրա շարունակվող սպառնալիքները, որպիսին էր օրինակ այն տեղեկության նետումը դաշտ, թե Սպիտակ տունն Իրանին զգուշացնում է հանկարծ չփորձել սպանել Տրամպին՝ որպես 2020 թվականին սպանված Ղասեմ Սոլեյմանիի վրեժ:

Ներեցեք, բայց անհեթեթ է մտածել, որ այդ վրեժը տենչալու դեպքում Իրանը պետք է սպասեր, որ Տրամպը դառնար ԱՄՆ նախագահի թեկնածու, և նոր միայն փորձեր սպանել նրան, երբ թեկնածուի հանդեպ էապես բարձրանալու է անվտանգության ուշադրությունը: Պարզապես, այդ արտահոսքով նշանակվել է «մեղավոր», իսկ մեսիջը հասցեագրվել է Տրամպին:

Կընդունի՞ Տրամպը այդ զգուշացումը: Մեծ հավանականությամբ՝ այո, ինչի մասին թերևս վկայում էր նրա հայտարարությունը, որ չհաղթելու դեպքում այլևս երբեք չի առաջադրվի ԱՄՆ նախագահի թեկնածու: Թվում է, թե տարիքի բերումով դա տրամաբանական էլ է: Բայց, առավել ևս այդպիսի տրամաբանական բաները չեն ունենում բարձրաձայնվելու կարիք, և թերևս բարձրաձայնվում են որպես այլ տրամաբանությամբ իրողությունների ակնարկ:»:

Աղբյուրը`   Հակոբ Բադալյան