«Թուրքիայի ԲՐԻԿՍ-ին անդամության հարցը կձգեն՝ դրա գինը հնարավորինս բարձրացնելու համար»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «ՆԱՏՕ գլխավոր քարտուղար Ռյուտեն հայտարարել է, որ Թուրքիան իրավունք ունի գործակցել ԲՐԻԿՍ-ի հետ: Ըստ նրա, Թուրքիայի այդ քայլի առնչությամբ ՆԱՏՕ-ում կարող են լինել տարբեր կարծիքներ, բայց Անկարայի իրավունքն է ԲՐԻԿՍ-ի հետ գործակցելը:

Ռյուտեի խոսքով, դրանից չի փոխվի Թուրքիայի նշանակությունը ՆԱՏՕ-ի համար և ՆԱՏՕ-ի նշանակությունը Թուրքիայի համար:

Թերևս պետք է ասել ավելին, քան ասում է Ռյուտեն: ԲՐԻԿՍ-ի անդամության ձգտումը Թուրքիայի և ՆԱՏՕ-ի փոխադարձ նշանակալիությունը ոչ միայն չի նվազեցնի, այլ՝ կավելացնի:

Թերևս հենց այդտեղ է նաև պատճառը, որ հենց Թուրքիան հուլիսին հայտարարեց ԲՐԻԿՍ-ի անդամ դառնալու ցանկության մասին՝ արտգործնախարար Ֆիդանի շուրթերով ասելով, որ ակնկալում են դրա հավանություն Կազանի գագաթնաժողովում, ՌԴ արտգործնախարար Լավրովը հայտարարեց, թե ԲՐԻԿՍ-ի անդամները որոշել են առժամանակ կանգնեցնել նոր անդամներ ընդունելու գործընթացը՝ արդեն կայացած ընդլայնումը մարսելու համար:

Հարցն ըստ իս այն է, որ թե՛ Ռուսաստանը, թե՛ ՉԻնաստանը, թե՛ Հնդկաստանը, թե՛ նաև նոր անդամ Իրանը, ունեն մտավախություն, որ Թուրքիան ԲՐԻԿՍ-ում կխաղա իրեն բնորոշ երկդիմի խաղը, ավելի շուտ դառնալով ՆԱՏՕ «ազդեցության գործակալը» ԲՐԻԿՍ-ում: Հետևաբար, Թուրքիայի անդամության հարցը թերևս կձգեն՝ դրա գինը հնարավորինս բարձրացնելու համար»: