«Եթե կա լայնածավալ թշվառություն, բարեկեցությունն առաջնային թիրախ է և աչքի փուշ»․ Նիկոլ Փաշինյան

«ՀՀ պետական բյուջեն մեր հավաքական ընտանիքի բյուջեն է: Պետական բյուջեի եկամուտները կախված են նրանից, թե ՀՀ յուրաքանչյուր քաղաքացի և բնակիչ, որքան, ինչ արդյունավետությամբ և թափանցիկությամբ է աշխատում։

Պետական բյուջեի եկամուտները ձևավորվում են, օրինակ, եկամտային հարկերից․ հոկտեմբերի 1-ի դրությամբ 768 հազար բնակիչներ աշխատում են, աշխատավարձ ստանում ու եկամտային հարկ վարում։ Մեր եկամտահարկի առյուծի բաժինը՝ 80 և ավելի տոկոսը ձևավորվում է աշխատավարձից,- այս մասին ԱԺ-ում 2025-ի բյուջեի նախագիծի քննարկման ժամանակ նշեց վարչապետ Նիկոլ Փաշինյանը:

Վարչապետի խոսքով՝ նաև օրինականության և արդարության մակարդակից է կախված մարդկանց աշխատելու, արդյունք ստեղծելու ցանկությունը և հնարավորությունների իրացումը։

«Պետական բյուջեի տեսակետից ՀՀ ապագան կախված է մեկ մարդուց և այդ մեկ մարդը դու ես․ արդյոք ՀՀ յուրաքանչյուր քաղաքացի բավարար չափով և արդյունավետ է աշխատում, որովհետև մեզնից յուրաքանչյուրի այդ աշխատանքից է կախված ոչ միայն մեր անձնական, այլ համընդահանուր բարեկեցությունը, այդ բարեկեցության, ասել է թե՝ մեր երկրի ապագան․․․ Հնարավոր է լավ վաստակել, բայց ընդհանուր թշվառության և աղքատության միջավայրում այդ վաստակը վայելելու հնարավորություն չունենալ, այլ ընդհակառակը՝ ունենալ մեկուսացվածության և տագնապի զգացողություն, որ աշխատանքով ձեռքբերածը կարող է կորսվել ապօրինի ինչ-ինչ ազդեցությունների հետևանքով, որովհետև եթե կա լայնածավալ թշվառություն և աղքատություն, բարեկեցությունն առաջնային թիրախ է և աչքի փուշ»,- նշեց Փաշինյանը։