«Հայաստան-ԵՄ առևտրատնտեսական հարաբերությունները ձեր կառավարության օրոք վատագույն վիճակում են»․ Արթուր Խաչատրյանը՝ Պարույր Հովհաննիսյանին

«Կառավարությունը պարբերաբար խոսում է Եվրոպայի հետ հարաբերությունները սերտացնելու, քաղաքականությունը դիվերսիֆիկացնելու մասին, այդ ամենն իրականում ինչպե՞ս է դրևորովում»,- ԱԺ-ում բյուջետային քննարկման ժամանակ ասաց «Հայաստան» խմբակցության պատգամավոր Արթուր Խաչատրյանը՝ հարցն ուղղելով ԱԳ նախարարի տեղակալ Պարույր Հովհաննիսյանին․ «Հայաստան-ԵՄ առևտրատնտեսական հարաբերությունները ձեր կառավարության օրոք վատագույն վիճակում են գտնվում։ Երբեք մեր արտաքին առևտրի մեջ դեպի ԵՄ արտահանումները 4,5% չեն եղել, ինչպես եղել է այս տարվա առաջին 6 ամսվա ընթացքում։
Ուզում եմ հասկանալ՝ ձեր կառավարությունը խոսքերից անդին ռեալ ի՞նչ է արել, որպեսզի Հայաստանը ԵՄ-ին մոտենա․ տնտեսությունը հեռացրել եք, CEPA-ն (Հայաստան-Եվրոպական Միություն համապարփակ և ընդլայնված գործընկերության համաձայնագիր) ձեզնից ավելի շուտ է կնքվել»,- հավելեց պատգամավորը։
Ի պատասխան Պարույր Հովհաննիսյանը թվարկեց հարաբերությունների մերձեցման մի քանի փաստ՝ նշելով, որ պայմանագրային հիմքը շարունակում է մնալ CEPA-ն, բայց գործընկերության նոր օրակարգը, որը բանակցում են, մոտակա շաբաթներին, կավարտվեն, ինչը լիարժեք կդարձնի գործընթացը․ «Նոր ոլորտներ կավելանան, օրինակ՝ անվտանգությունը, այս ոլորտում ամենաշոշափելի առաջընթացը ԵՄ առաքելության գործունեությունն է»,- ասաց Հովհաննիսյանը՝ հավելելով, որ ԵՄ մի շարք երկրներում դեսպանատներ են բացվել։ «Ես էլ բավարարված չեմ առևտրատնտեսական ծավալով ու թվերով, և այդ հարցը միշտ բարձրացվում է, սակայն միաժամանակ պետք է նշել, որ բոլոր առումներով առաջընթացը կշարունակվի, հատկապես՝ գալիք տարվա ընթացքում»,- ասաց Հովհաննիսյանը։