«Փաշինյանը սափրվեց, նաև մնացածին «սափրեց»․ ոչ մի տրագեդիա չկա»»․ Գագիկ Մելքոնյան

«Վարչապետը տեսնում է՝ որտեղ դժգոհություն կա, որտեղ կարելի է շտկել, ու կատարում է կադրերի փոփոխություն, ոչ մի տրագեդիա չկա»,- այս մասի «Նյուզ»-ի հետ զրույցում նշեց ԱԺ «Քաղաքացիական պայմանագիր» խմբակցության պատգամավոր Գագիկ Մելքոնյանը՝ անդրադառնալով բարձրաստիճան վեց պաշտոնյաների պաշտոնանկություններին։

«Այնպես չէ, որ մարդը աշխատել է գերազանց, հոյակապ ու իրեն գալիս, ասում են՝ թող գնա։ Ինձ թվում է, որ ժամանակը կգա, բոլորն էլ կիմանան, թե որ պաշտոնյան ինչի համար է ազատվել»,- նշեց պատգամավորը:

Անդրադառնալով դիտարկմանը, որ դժգոհություններ կան նաև Նիկոլ Փաշինյանից, և հարցին՝ իսկ ինչո՞ւ ինքն էլ հրաժարական չի տալիս, Գագիկ Մելքոնյանը պատասխանեց. «Դժգոհությունները որտեղի՞ց են գալիս: Երբ որ մարդիկ դժգոհում են վարչապետից, դժգոհում են վարչապետի նշանակած նախարարներից: Իրենց աշխատանքի արդյունքում է, որ երկրի վարչապետը քննադատվում է: Եթե լավ չեն աշխատում, եթե տվյալ նախարարությունը անգործունակ է, ուրեմն մեղավորը վարչապետն է։ Դրա համար վարչապետը հիմա իր սխալներն ուղղում է»:

Անդրադառնալով հարցին՝ Փաշինյանը հեղափոխությունից 6 տարի անց սափրվեց, ու կտրուկ կադրային փոփոխություններ արեց, ուղե՞րձ էր դա, Մելքոնյանը կատակով արձագանքեց. «Ինքը սափրվեց, նաև մնացածին «սափրեց»․․․ Կան օղակներ, որ հետ են քաշվում, դրա համար պետք է նոր ղեկավարներ նշանակել․․․ Մեր խնդիրը ընտրությունները չեն, տարիուկես դեռ կա, մենք պիտի մտածենք այս ընթացքում խաղաղության, անվտանգության հարցերը լուծենք»: