«Միջուկային տերությունների ղեկավարները խելագարներ չեն, որ չպատկերացնեն ինքնաոչնչացման սպառնալիքը»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «ԱՄՆ ռազմավարական հրամանատարության պաշտոնական ներկայացուցիչ, փոխ-ծովակալ Թոմաս Բյուկենենը Վաշինգտոնում քննարկման ժամանակ հայտարարել է, որ չնայած այդ երկրների հետ հարաբերություններում լարվածությանը, ԱՄՆ պետք է պատրաստ լինի միջուկային ռազմավարական մրցակիցներ Ռուսաստանի, Չինաստանի և Հյուսիսային Կորեայի հետ մշտական երկխոսության՝ միջուկային պատերազմ թույլ չտալու համար:

Համաձայն խաղաղության ու պատերազմի հարցերն ուսումնասիրող Ստկոհլոմի ինստիտուտի 2023 թվականի տվյալի, Ռուսաստանը տնօրինում է 4,5 հազար միջուկային մարտագլխիկ, ԱՄՆ՝ 3,7 հազար:

Չեմ կարծում, որ միջուկային տերությունները ղեկավարում են խելագարներ: Անշուշտ, համաշխարհային ընթացքը բախտորոշ կամ ճակատագրական շրջադարձերի կարող է բերել մանրուքն անգամ, սակայն, ես գնահատում եմ իրավիճակը այսպես ասած առկա իրողությունների ելման կետից և ըստ այդմ համարում, որ միջուկային տերությունների ղեկավարները խելագարներ չեն, որպեսզի չպատկերացնեն ինքնաոչնչացման սպառնալիքը՝ միջուկային պատերազմի դեպքում:

Անշուշտ այս հանգամանքը մեզ՝ փոքր պետություններիս, կարող է միայն մխիթարել, բայց ոչ հանգստացնել: Որովհետև նրանք չեն ոչնչացնի միմյանց, բայց միմյանց հետ ռազմավարական դիմակայությունում, որ վարում են աշխարհում ազդեցության գոտիների ու ռեսուրսների համար պայքարի շրջանակում, նրանք հանգիստ կարող են ոչնչացնել «կողմնակի» ցանկացածին:

Հենց այստեղ է նաև, որ շատ կարևոր է դառնում նրանցից յուրաքանչյուրի հետ աշխատանքը, և մեղմ ասած տարակուսելի է հնչում որևէ միտք կամ կոնցեպտ, որը կարող է պարունակել նրանցից որևէ մեկի հետ անգամ մոտավոր կոնֆլիկտային ռեժիմ»: