Նիկոլ Փաշինյանը մանրամասնեց, թե ինչպես են անցկացվելու Գյումրու քաղաքապետի նախնական ընտրությունները

Վարչապետ Նիկոլ Փաշինյանն ԱԺ-ում հայտնեց, որ «Քաղաքացիական պայմանագիր» կուսակցության վարչության որոշմամբ Գյումրիի քաղաքապետի նախնական ընտրություններին կմասնակցեն 7 թեկնածուներ (Լևոն Անանյան, Դավիթ Առուշանյան, Շավարշ Արամյան, Էմմա Բարսեղյան, Սարիկ Մինասյան, Վահագն Մկրտչյան, Կարեն Սարուխանյան):
«Նախնական քվեարկությունը տեղի կունենա դեկտեմբերի 8-ին, 9-ին և10-ին: «Քաղաքացիական պայմանագիր» կուսակցության ներկայացուցիչների կողմից կիրականացվի այդ նախնական քվեարկությունը, պատահական ընտրանքով տարբեր տեղերում գյումրեցիներին կառաջարկվի քվեաթերթիկ, որով նրանք կքվեարկեն թեկնածուներից մեկի օգտին։ Հայտարարել եմ, որ հաղթած թեկնածուին կնշանակեմ քաղաքապետի ժամանակավոր պաշտոնակատար»,- ասաց Փաշինյանը՝ մանրամասնելով․ «Կիրակի, երկուշաբթի և երեքշաբթի մեր սիրելի գյումրեցիների դռները կծեծեն մեր ներկայացուցիչները և կառաջարկեն քվեարկել։ Լավ չենք պատկերացնում ծավալը, թե երեք օրվա ընթացքում քանի գյումրեցու կկարողանանք դիմել, բայց աշխատանքի գրաֆիկները հստակ սահմանված են, որպեսզի օբյեկտիվ չափիչներ լինեն։ Ինչքան գյումրեցիներ կհասցնեն քվեարկել, այդ արդյունքները կդրվեն հետագա որոշման հիմքում»,- ասաց Փաշինյանը՝ հայտնելով, որ եթե ընթացքը լինի գոհացուցիչ, մեխանիզմը հետագայում ևս կկիրառվի։