ՔՊ-ականները ջնջում են իրենց նամակագրությունները. արտահոսքի հետքերով. «Ժողովուրդ»

«Ժողովուրդ» օրաթերթը գրում է. «ՔՊ-ում երեկ իսկական «արմագեդոն» էր: Իշխանական «շարքային» պատգամավորները ապշած ու միևնույն ժամանակ վախեցած այս ու այն կողմ էին շրջում, չգիտեին՝ ինչ վարքագիծ դրսևորեն. չէին խոսում, լուռ դիտորդ էին: Նախ՝ ՔՊ-ական պատգամավորներն անակնկալի էին եկել, որ Նիկոլ Փաշինյանը, այդպես ստորացնելով, խայտառակելով հեռացրեց Հովիկ Աղազարյանին, ԱԺ ամբիոնից էլ սպառնաց, որ ամեն ինչ արվելու է պատգամավորին մանդատից զրկելու համար: ՔՊ վերնախավի 3 ներկայացուցիչներ՝ Ալեն Սիմոնյանը, Հայկ Կոնջորյանը և Արթուր Հովհաննիսյանը, իրար հերթ չտալով, խոսում էին, թե շոկի մեջ են Աղազարյանի մասին բացահայտումներից, ամաչել են, թե ինչեր են կարդացել, ինչ է գրել Աղազարյանը սոցցանցում իր քննադատներին: Այս պաշտոնյաները մոռացել են, կամ գուցե նրանց «հրահանգվել» է մոռանալ, որ Աղազարյանը կանանց հասցեին էր հայհոյանքներ գրել ու ստել, թե հեռախոսի գաղտնաբառը կոտրել են ու իր անունից գրել:
«Ժողովուրդ» օրաթերթը այս մասին գրել էր, նաև հիշեցրել, որ նույն Աղազարյանը հայհոյեց Եռաբլուրում զոհվածների հարազատներին ու, բոլոր դեպքերում, մնաց անպատիժ: Բացի այդ, Աղազարյանը, «Ժողովուրդ» օրաթերթի տեղեկություններով, Կառավարություն-խմբակցություն հանդիպումից որոշակի տեղեկություններ է պատմել լրատվամիջոցներին, որն էլ ՔՊ-ն համարում է պետգաղտնիքի հրապարակում: Դրանից բացի, երբ Հովիկ Աղազարյանի հեռախոսի ողջ տեղեկությունը Փաշինյանի սեղանին է հայտնվել, ՔՊ-ականները սկսել են վախենալ:
«Ժողովուրդ» օրաթերթին ԱԺ-ում պատմեցին, որ երեկ պատգամավորները իրենց շատ նամակագրություններ ջնջում էին հեռախոսների միջից: Մտավախություն ունեն, որ ցանկացած պահի Փաշինյանը կարող է բարկանալ, և իրենց անձնական խոսակցությունները, գաղտնիքները նույնպես նման խայտառակ կերպով կհանրայնացվեն»:

Մանրամասները՝ աթերթի համարում: