«Զուրաբիշվիլին շարունակում է հայ-վրացական ջուր պղտորելու իր գործը». Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը. «Վրաստանի նախագահ տիկինը՝ Զուրաբիշվիլի ազգանունով, շարունակում է հայ-վրացական ջուր պղտորելու իր գործը: Նա իր նոր հարցազրույցում իբրև թե պարզաբանել է «հայկական կարուսել» արտահայտությունը, որ օգտագործել էր Վրաստանում խորհրդարանի ընտրության իբրև թե կեղծված լինելու մասին իր գնահատականում:

Զուրաբիշվիլին հայտարարել է, թե այդ արտահայտությունը չունի որևէ էթնիկ պատկանելության հարց: «Եթե չեմ սխալվում, Հայաստանում դա անվանում են «վրացական կարուսել»»,- հայտարարել է նա:

Էթնիկ պաատկանելության հարց կա, թե՝ ոչ, սա առանձին թեմա է, բայց որ տիկնոջ մոտ կա ընդհանրապես ողջախոհության հարց, թերևս ակնառու է: Ո՞վ է նրան ասել, թե Հայաստանում երբևէ օգտագործվել է «վրացական կարուսել» արտահայտությունը: Ե՞րբ է նա լսել այդ մասին, երբ եղել է, օրինակ, Ֆրանսիայի արտաքին գործերի նախարարության կամ հատուկ ծառայության աշխատակի՞ց, թե՞ երբ տեղափոխվել է Վրաստան և զբաղեցրել ԱԳ նախարարի, հետո նախագահի պաշտոնը:

Զուրաբիշվիլին ումի՞ց է լսել մի արտահայտություն, որը Հայաստանում չի օգտագործվել երբևէ: Հայաստանում ընտրությունների կեղծված լինելու մասին հայտարարվել է ամեն ընտրական պրոցեսից հետո, բայց այդ ժամանակ քաղաքական որևէ ուժ լեզվի ծայրով անգամ չի հիշատակել «վրացական կարուսել» արտահայտությունը:

Տիկինը չգիտե՞ այդ մասին, թե՞ զբաղված է գիտակցված մանիպուլյացիայով, երբ իր մի արտահայտությունն իբրև թե շտկելու համար, անում է մեկ այլ հայտարարություն, այլ կերպ ասած, զբաղված է ոչ թե իր հայտարարության արատավոր բնույթը շտկելու, այլ ընդամենը՝ շրջելու գործով:

Ի դեպ, լավ կլիներ, որ մի բացատրություն էլ տար իր անձնական էջում հայտնի զբոսաշրջային հղման համար, որ առաջացրել էր մեծ աղմուկ: Թեև, գուցե լավագույն տարբերակը կլինի նրա ոչ թե որևէ բացատրություն, այլ պարզապես լռությունը»: