«Մեսիջը սա է․ «ո՞վ եք դուք, որ Նիկոլին «չէ» ասեք»․ Աննա Գրիգորյան

«Նիկոլ Փաշինյանը երբեք չի ներում այն մարդկանց, ովքեր ստրուկի կարգավիճակում չեն ծառայում իրեն, և Հովիկ Աղազարյանն այդ ճակատագրին արժանացավ, քանի որ նրա ուղարկած sms-ին դրական չպատասխանեց»,- այս մասին 24Նյուզ-ի հետ զրույցում ասել է ԱԺ «Հայաստան» խմբակցության պատգամավոր Աննա Գրիգորյանը։

«Ո՞վ եք դուք, որ Նիկոլին «չէ» ասեք, բացասական պատասխան տաք, ընդհանրապես հակաճառեք․ սա է մեսիջը»,- նշեց պատգամավորը՝ հավելելով՝ ես գիտեմ, որ ՔՊ-ականները փոխել են իրենց հեռախոսները, պարունակությունն են ջնջել, բայց դա չի փրկելու։

Գրիգորյանի խոսքով՝ եթե Աղազարյանն իրականացրել է իրավախախտում, թող դատախազը մտներ խորհրդարան, զրկեր նրան անձեռնմխելիությունից ու քաղաքակիրթ ձևով իրավական գործընթաց իրականացվեր, ոչ թե պատգամավորից հրեշ կամ պետական դավաճան կերտեն և մինչև վերջ ստորացնեն, ոչնչացնեն՝ անձնական կյանքը հանրայնացնելով՝ քաղաքական նպատակներով։ «Սա Հովիկ Աղազարյանի անձի խնդիրը չէ, սա բարոյական նորմերի սարսափելի ոտնահարում է»,- ընդգծեց պատգամավորը։