«Փաշինյանի լսարանն ամենաանգրագետ, լյումպեն մասսան է»․ Սուրեն Սուրենյանց

Նիկոլ Փաշինյանի գրառումների, վիդեոռոլիկների լսարանը իրականում ամենաանգրագետ, լյումպեն մասսան է, և ինքն էլ դա շատ լավ հասկանում է, թե չէ՝ չէր գրի, որ «մենք ավելի շատ ենք ձեզ վրա ծախսում, քան դուք ձեր ընտանեկան բյուջեով»։ Այս մասին նշեց «Դեմոկրատական այլընտրանք» կուսակցության նախագահ, քաղաքագետ Սուրեն Սուրենյանցը՝ 168-ի եթերում։ Նա շեշտեց, որ այդ լյումպենը մնացել է Փաշինյանի միակ էլեկտորալ հենարանը, եթե մի կողմ թողնենք ուժային ռեսուրսը, նա չի տիրապետում իշխանության շուրջ տեղի ունեցող զարգացումներին․ կառավարում է ռիսկերը, բայց չի տիրապետում։
Ըստ Սուրենյանցի՝ ինչո՞ւ պիտի խելամիտ մարդը խորագիր դնի՝ «գնդակահարության պատի տակ», եթե ինքը չի առերեսվում նման դաժան հեռանկարի հետ։ Բանախոսի բնորոշմամբ, Փաշինյանը ենթագիտակցորեն գիտի, թե ինչի առաջ է կանգնեցրել պետությունը, դա գիտեն նաև իր շրջապատի մարդիկ, որոնց մի մասը հղփացել է, մյուս մասը հեռանում է ՔՊ-ից ոչ թե մակերեսին երևացող պատճառներով, այլ որովհետև նրանք ավելի մեծ վախեր ունեն։