«Հայ պատանդները ձեռնպահ են մնում հրապարակային գործելակերպից»․ Սիրանուշ Սահակյան

«Ռուբեն Վարդանյանի պարագայում մի փոքր ավելի թափանցիկ պատկեր ունենք, քանի որ ընտանիքի անդամները իրենց հայտնի տեղեկությունները կիսում են նաև հանրության հետ, փորձում են հասնել խնդրի միջազգայնացման, սակայն այս մոտեցումը չեն ընդունում կամ կիրառում մյուս հայ պատանդները»։ Այս մասին հայտնեց իրավապաշտպան, ՄԻԵԴ-ում հայ գերիների ներկայացուցիչ Սիրանուշ Սահակյանը՝ 168-ի եթերում պատասխանելով այն հարցին, թե ֆիզիկապես ի՞նչ վիճակում են գտնվում Ադրբեջանի բանտերում պահվող հայ քաղաքական-պետական գործիչները։
Ըստ Սահակյանի, պատանդները մտահոգություն ունեն, որ տվյալների հրապարակայնությունը կարող է հանգեցնել հավելյալ վրեժխնդրության կամ բարդացնել ազատ արձակման գործընթացը։ «Դրանով պայմանավորված՝ ձեռնպահ են մնում բացահայտ հրապարակային գործելակերպից։ Տեղեկատվության աղբյուրը Կարմիր խաչն է, ցավոք, որևէ այլ մեխանիզմ պարզապես չի գործում, և մեխանիզմի բացակայությունն ինքնին ցուցադրում է, թե որքան կամայական մթնոլորտում են պահվում հայ պատանդները»։