«Մենք պարտավոր ենք հաշվի առնել պարենային և էներգետիկ անվտանգության ռիսկերը»․ Մհեր Գրիգորյան

«Աշխարհը հայտնվել է մի վիճակում, որտեղ տրադիցիոն-ինստիտուցիոնալ լուծումները, մեղմ ասած, լավ չեն աշխատում։ Միևնույն ժամանակ մենք հայտնվել ենք մի իրավիճակում, և դա վերաբերելի չի միայն Հայաստանին, առնվազն տարածաշրջանում բոլոր երկրները էդ ռիսկի հետ բախվում են»։ Այսպիսի տեսակետ է հայտնել ՀՀ փոխվարչապետ Մհեր Գրիգորյանը՝ «Ի՞նչ փուլում է ԵՄ-ի հետ կապված գործընթացը․ մարտահրավերներ և հնարավորություններ՝ 2025-ին ընդառաջ» թեմայով կոնֆերանսին։
«Մենք ուղղակի պարտավոր ենք հաշվի առնել պարենային անվտանգության ռիսկերը, էներգետիկ անվտանգության ռիսկերը, և ըստ այդմ կառավարել և ձևավորել օրակարգերը»,- նշել է փոխվարչապետը։ Ըստ նրա, իրավիճակը փոփոխական է, և փոփոխությունները զգում ենք ամեն օր։
«Հանրապետություն» կուսակցության ղեկավար Արամ Սարգսյանն իր հերթին ասել է․ «Մենք ունենք ռազմական անվտանգության խնդիր, մեր ռազմական դաշնակիցը, մեղմ ասած, չի ճանաչում մեր պետության սահմանները, մեր վճարած գումարի դիմաց սպառազինություն չի տալիս, որևէ պատասխանատվություն չի կրում»,- նշել է Սարգսյանը՝ հավելելով, թե մեր ռազմական դաշնակցին փոխել է պետք՝ նոր դաշնակից գտնելու համար։