«Չգիտեմ, Փաշինյանը մտածո՞ւմ է նման վտանգավոր մտքեր արտահայտելուց առաջ»․ Վիտալի Մանգասարյան

«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «Նիկոլ Փաշինյանը հայտարարում է, որ բանակը պետք է տեղավորվի խաղաղության օրակարգի տրամաբանության մեջ:
Հիշեցնեմ, որ Ադրբեջանի նախագահը ընդամենը ժամեր առաջ հայտարարել էր, որ այսպես կոչված խաղաղության պայմանագիրը և Հայաստանի՝ մեր դեմ միաժամանակ զինվելը երկու անհամատեղելի ճանապարհներ են:
Փաստացի, Փաշինյանը՝ «պատասխանելով Ալիևին», ֆիքսում է, որ ջանք չի խնայում բանակը այսպես կոչված խաղաղության օրակարգի տրամաբանության դաշտ բերելու գործում, ինչը նշանակում է, որ Ալիևը կա՛մ ճիշտ էր, կա՛մ առնվազն մասամբ էր ճիշտ:
Չգիտեմ, Փաշինյանը ընդհանուր առմամբ մտածո՞ւմ է նման վտանգավոր մտքեր արտահայտելուց առաջ (այն էլ՝ Ալիևի հայտարարությունից անմիջապես հետո), թե ոչ, սակայն առավել քան համոզված եմ, որ ադրբեջանական գիշատիչները նման հայտարարությունները մեր դեմ օգտագործելու ջանք չեն խնայի»: