«Ես Նոստրադամուսը չեմ, որ կարողանամ ասել՝ ինչ է սպաստվում սիրիահայերին»․ Զարեհ Սինանյան

«ԱԳՆ ներկայացուցիչները, պայմանավորված ռազմական գործողությունների սուր պահից, տեղափոխվել էին Բեյրութ, սակայն հիմա վերադառնում են մշտական վայրեր, այսինքն՝ Դամասկոս և Հալեպ»,- ներկայացնելով Սիրիայում տիրող վիճակը՝ «ԱրմԼուր»-ի հետ զրույցում ասաց ՀՀ Սփյուռքի գլխավոր հարցերի հանձնակատար Զարեհ Սինանյանը։ «Իսկ թե ինչ ճակատագիր է սպասում մեր հայրենակիցներին, դուք մի այնպիսի հարց եք տալիս, որ դժվար է․ Նոստրադամուսը չեմ ես, որ կարողանամ ասել»,- նկատեց նա։
Դիտարկմանը, որ սիրիահայերի մոտ անորոշ վիճակ է, չգիտեն՝ ինչպես կազմակերպեն իրենց հետագա կյանքը, Սինանյանը ասաց․ «Անորոշությունը շարունակական բնույթ է կրում, բայց էդ անորոշության էությունը անընդհատ փոխվում է․ եթե նոյեմբերի 29-ին, երբ Հալեպը ընկավ, մեկ այլ անորոշություն էր, ապա յոթ օր հետո, երբ Դամասկոսն ընկավ, մեկ այլ ձևի անորոշություն էր, այսօր լրիվ այլ անորոշություն է»։ Ըստ նրա, տարհանման պահանջարկ այս պահին չկա։