«Ադրբեջանը Պակիստանից գնել է 18 կործանիչ, Թուրքիայից՝ հրթիռային հրետանային համակարգեր»․ Հրանտ Բագրատյան

Իլհամ Աիլևը նպատակ ունի հարձակվելու Հայաստանի վրա, և որպեսզի դա արդարացնի, չակերտավոր «հիմքեր» է ստեղծում, մեկը՝ իբր որ մենք սպառազինվում ենք, և դա վտանգ է իրենց համար, մյուսը՝ որ ինչ-որ ադրբեջանցիներ կան 300 հազար, որոնք կարոտել են Հայաստանը՝ իրենց «հայրենիքը» և պիտի գան-ապրեն իրենց «հայրենիքում», մեկ այլ պատրվակ էլ հանդիսանում է Սյունիքի միջանցքը։ Այսպիսի տեսակետ հայտնեց ՀՀ նախկին վարչապետ Հրանտ Բագրատյանը «Հրապարակ»-ի եթերում։
«Ես հիմա բացատրեմ, թող էդ ամերիկացին, ֆրանսիացին կամ ռուսը ենթադրեն՝ ով է ավելի ագրեսիվ»,- ասաց նա։
Բագրատյանն ընդգծեց, որ ՀՀ-ն իր պաշտպանական ծախսերը 2025-ին ավելացնելու է 19 տոկոսով, Ադրբեջանը՝ 34 տոկոսով։ ՀՀ բյուջեն ավելանում է 7 տոկոսով, Ադրբեջանի բյուջեն ավելանում է 1 տոկոսով, այսինքն Ադրբեջանի բյուջեի մեջ պաշտպանության ծախսերի տեսակարար կշիռը կտրուկ աճում է։ Նախկին վարչապետի խոսքով, ՀՀ պաշտպանական բյուջեն է՝ 1,5 մլրդ դոլար, Ադրբեջանինը՝ 8,5 մլրդ մանաթ կամ 5 մլրդ դոլար։
Ադրբեջանը Պակիստանից գնել է 18 կործանիչ՝ 4+ սերնդի հարձակողական զինատեսակ, Հայաստանը չի նախատեսում ավիացիայի ձեռքբերում, Հայաստանն ըստ էության կործանիչ ավիացիա չունի։ Բացի այդ, Ադրբեջանը Թուրքիայից ձեռք է բերում հրթիռային հրետանային համակարգեր, նաև մեծ քանակով «Պոլոնեզ» հրթիռներ, որոնց հեռավորությունը մինչև 350 կմ է։