«Ադրբեջանում ուշադիր լսել են 2022թ. ընդդիմության առաջ բերած թեզը»․ Վիկտոր Սողոմոնյան

«Էդ թուղթը ստորագրված կլինի, թե չէ՝ աշխարհին միևնույն է։ Աշխարհին միևնույն է՝ էդ թուղթը կլինի, չի լինի․ էստեղ աշխարհաքաղաքական գործողություններ են, որտեղ էլի մենք բացարձակ սուբյեկտ չենք, օբյեկտ ենք», 5-րդ ալիքի եթերում այսպիսի տեսակետ է հայտնել քաղաքական գիտությունների դոկտոր, Մոսկվայի Միջազգային հարաբերությունների պետական ինստիտուտ-համալսարանի պրոֆեսոր Վիկտոր Սողոմոնյանը՝ մեկնաբանելով Հայաստանի և Ադրբեջանի միջև հնարավոր «խաղաղության պայմանագրի» ստորագրումը։
Նրա խոսքով, կա տպավորություն, որ այդ քննարկումները միտված են հաջորդ իշխանությունների հետ պայմանավորվածություններ ձեռք բերելուն. «2022 թվականի «Դիմադրության շարժման» ժամանակ ընդդիմությունը մի թեզ առաջ բերեց, որ կարող են ընդունել չեղարկման հռչակագիր, այսինքն՝ ցանկացած որոշում Արցախի ու մեր արտաքին քաղաքականության հետ կապված, եթե թուղթ կընդունի այս վարչակազմը, հաջորդ իշխանությունները չեղարկելու են։ Այս հայտարարությունը շատ ուշադիր են լսել են Ադրբեջանում ու Թուրքիայում»,- նշել է Սողոմոնյանը և հիշեցրել Իլհամ Ալիևի խորհրդականի հայտարարությունը․ «Մենք չենք ուզում համաձայնագիր կնքել Փաշինյանի հետ, ուզում ենք կնքել հայ ժողովրդի հետ»։ Չեմ կարծում, որ Բաքուն և Անկարան աշխատում են Փաշինյանին ինչ-որ բան համոզելու համար, նա շատ բանի արդեն համաձայն է, բայց նրանք փորձում են ապահովել այնպիսի պայմաններ, որ Հայաստանի հաջորդ իշխանությունները հնարավորություն չունենան որոշումները չեղարկել»: