«Հայաստանը կորցրել է տարածքներ, բայց շարունակում է Ռուսաստանից իր կախվածությունը». Արման Բաբաջանյան

ԱԺ նախկին պատգամավոր Արման Բաբաջանյանի գրառումը․ «Ադրբեջանը ժամանակին պարտվեց, կորցրեց տարածքներ, հասկացավ, որ իր ուժը զարգանալու, աշխարհին ինտեգրվելու մեջ է։ Հակառակ բոլոր «կանխատեսումներին», արևմուտքի աջակցությամբ կառուցեց իր գազամուղերը, նավթամուղերն ու կապվեց միջազգային տնտեսությանը։ Դրա հետ եկավ ուժ։
Հայաստանը կորցրել է տարածքներ, բայց շարունակում է Ռուսաստանից, ռուսական «չ»տնտեսությունից իր կախվածությունն ու պատանդ մնալ այն նույն մտածողությանը, որն իրեն երեկ պարտության բերեց։
Արցախը կորցնելուց հետո Հայաստանում ոչ միայն չի դադարել, այլև սաստկացել է ռուսական բազմանիստ հոգեբանական պատերազմը։ Դրա թիրախում են հանրության բոլոր խավերն ու շերտերը։ Դրա միջոցը կեղծ կամ խեղաթյուրված «տեղեկատվությամբ» ու սուբվերսիվ գործողություններով բոլորին միմյանց դեմ հանելն է, իսկ նպատակը՝ հայկական հանրության վերջնական կամազրկումն ու պետականության նկատմամբ հավատի ոչնչացումը։
Այսօր Հայաստանը պետք է հասկանա այս իրավիճակի ողջ վտանգը, որպեսզի չկորցնի նաև այն, ինչ ունի դեռևս՝ իր կենսունակությունն ու ռացիոնալն իբրև անկախ պետություն։
Քրիստոս ծնաւ եւ յայտնեցաւ, ձեզի եւ մեզի մեծ աւետիս:
Շնորհավոր Սբ. Ծնունդ»։