«Եվրոպական որևէ երկրի ղեկավար նույնիս ակնարկ չի արել, որ Հայաստանին սպասում են ԵՄ-ում»․ Էդուարդ Շարմազանով

«Ալիևի ռազմատենչ հռետորաբանությունը քանդեց Հայաստանի հասարակության պատրանքները՝ «խաղաղության խաչմերուկի» և «խաղաղության պայմանագրի» հետ կապված»,- «24Նյուզ»-ի եթերում ասաց ՀՀԿ ԳՄ անդամ Էդուարդ Շարմազանովը։ Անդրադառնալով կառավարության կողմից «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագծի հաստատմանը՝ Շարմազանովն ասաց․ «Ալիևը ձախողեց Նիկոլ Փաշինյանի խաղաղության օրակարգը։ Այսինքն Փաշինյանը իր գլխավոր քարոզչական թեզից այլևս չի կարող օգուտներ քաղել։ Որպեսզի նոր օգուտներ քաղի, պետք է գնա պլան բ-ի, որն էլ ժողովրդի աչքերին թոզ փչելն է, թե Հայաստանը պետք է մտնի Եվրոմիություն, թե հիմա էլ գնում ենք դեպի Եվրոպա, հանրաքվե ենք անում և Եվրոպայում մեզ սպասում։ Սա պատրանք է, քանի որ որևէ եվրոպական երկրի ղեկավար նույնիս ակնարկ չի արել, որ Հայաստանին սպասում են ԵՄ-ում»,- ասաց Շարմազանովը՝ նշելով, որ հետխորհրդային տարածաշրջանում ով գնացել է ԵՄ-ի հետ մերձեցման, բացի խնդիրներից այլ բան չի ստացել։