«Ձեր տնտեսական քաղաքականությունը ձախողված է»․ Արթուր Խաչատրյանը՝ Վահե Հովհաննիսյանին

ԱԺ ֆինանսավարկային և բյուջետային հանձնաժողովի նիստում քննարկվում է 2024 թվականի պետական բյուջեի 9 ամիսների կատարման ընթացքի վերաբերյալ տեղեկանքը։ Հիմնական զեկուցողը Ֆինանսների նախարար Վահե Հովհաննիսյանն է։ Ընդդիմադիր պատգամավոր Արթուր Խաչատրյանը տեսակետ հայտնեց, որ կառավարությունը, թեպետ խոստացել էր 7-9 տոկոս տնտեսկան աճ, սակայն չի կարողանում այն ապահովել․ «2021 թվականից այս կողմ 7 տոկոս աճ չեք ապահովում։ Ասում եք, որ չեք ապահովելու նաև 2025 թվականին։ Այսինքն ձեր տնտեսական քաղաքականությունն այս պահի դրությամբ ձախողված է»,- ասաց Խաչատրյանը՝ հավելյալ հարց ուղղելով նախարարին․ «Հայաստանը սպառում էր Արցախից ներկրված որոշ ապրանքներ, Արցախի կորստից հետո Հայաստանը որքա՞ն է դրսից այդ ապրանքները ներմուծում՝ վճարելով արտարժույթով, և որքա՞ն է կազմում տնտեսական կորուստը»։
Ի պատասխան պատգամավորի տեսակետներին և հարցերին՝ Վահե Հովհաննիսյանը պատասխանեց․ «Մենք ոչ թե ձախողել ենք, այլ հաջողել ենք։ Ստեղծել ենք ճիշտ միջավայր տնտեսական աճ ունենալու համար։ Մենք խոստացել էինք միջինում 7 տոկոս աճ, որն այս պահին ավելին է, սական միջին ցուցանիշը կհաշվենք, երբ կառավարության ծրագիրն ավարտվի; Ինչ վերաբերում է ԼՂ-ից ապրանքների ներմուծման հետ կապված փոփոխությանը՝ մենք նման վերլուծություն չունենք, չեմ կարող այդ հարցին պատասխանել»,- ասաց նախարարը։