Ոսկու շուկայի աշխատակիցների բողոքի ակցիան՝ ուղիղ միացմամբ

Ոսկու շուկայի աշխատակիցները Կառավարության շենքի դիմաց բողոքի ակցիա են իրականացնում։ Նրանք պահանջում են չեղարկել հարկերի բարձրացման որոշումը, որն իրենց խոսքով անհամատեղելի է փոքր բիզնեսի հետ։
Ակցիայի մասնակիցները Կառավարության որոշումը համարում են «կարմիր գիծ»։ «Մեզ թուղթ են տվել, որ մեր սեղանի եղածը պետք է գույքագրենք։ Ասենք՝ ես ցույց եմ տվել 5 կգ ոսկի, հետո հարկայինը եկավ կշռեց, դարձավ 5կգ 200գ, ասելու է՝ էդ 200 գրամի փաստաթուղթը ցույց տուր, ես էլ չունեմ այդ փաստաթուղթը, ստացվում է, որ չհաշված 10% շրջանառության հարկը, 20% էլ տուգանք են մեզ վրա դնում»,- ասաց տնտեսվարողներից մեկը՝ նշելով, որ պահանջվող փաստաթղթաշրջանառությունն ապահովելու համար ամեն մեկն իր սեղանի կողքին պետք է մեկ հաշվապահ պահի, որն անհնար է, և որ հարկային օրենսգրքում կատարված փոփոխությունների վերաբերյալ իրենց հետ ոչ մի քննարկում չի եղել։

«Կառավարության նոր որոշման համաձայն, առաջվա 5%-ը դառնում է 10%, և եթե ձեռքբերման թուղթ էլ ցույց չես տալիս, 20% էլ ավելանում է»,- ասում են տնտեսվարողները՝ նշելով, որ հարկերը կրկնապատկվում են։