«Ադրբեջանի հերթական նկրտումների թիրախում Կիրանց-Ոսկեպար ճանապարհն է»․ Գառնիկ Դանիելյան

«Արդեն հայտարարությունը եղել է, որ Տավուշում տեղի է ունենալու, այսպես կոչված, սահմանազատման և սահմանագծման գործընթաց։ Ադրբեջանից հայտարարել են, որ այդ ամենն իրենց նախաձեռնությամբ է տեղի ունեցել, ինչը մեզ համար խիստ մտահոգիչ է»,- ԱԺ հայտարարությունների ժամին նշեց «Հայաստան» խմբակցության պատգամավոր Գառնիկ Դանիելյանը։

Նա հարցադրում արեց՝ ինչո՞ւ սահմանազատման-սահմանագծման գործընթացը չի սկսվում Ներքին Հանդից, Ջերմուկից, Գեղարքունիքի մարզից։

«Նպատակն ավելի քան պարզ է։ Ես մտավախությունները փոխանցում եմ մեր հայրենակիցներին, որ հերթական թիրախում Կիրանց-Ոսկեպար ճանապարհն է։ Այդ ճանապարհի 4-5 տեղով հատումները, որ կան, ադրբեջանական կողմն այդ տարածքների նկատմամբ ունի նկրտումներ։ Եվ դրանով է պայմանավորված, որ Բայրամովի գրասենյակը, այն հարցին, թե հայկական 32 բնակավայրերի հետ կապված ի՞նչ նպատակներ ունեն և պատրաստվո՞ւմ են արդյոք այդ 32 բնակավայրերը վերադարձնել Հայաստանին, սևով սպիտակի վրա գրել է, որ այդպիսի բան գոյություն չունի, և հայկական կողմը որևէ սանտիմետր չի ստանալու։ Մենք տեսնում ենք, որ ադրբեջանական կողմն իր պահանջների մեջ հետևողական է, և հայկական կողմն անընդհատ գնում է զիջումների»,- ընդգծեց Գառնիկ Դանիելյանը։