«Փաշինյանը և Թրամփը որոշակի անձնական շփումներ ունեն»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Փետրվարի 3-ից 7-ը Հայաստանի վարչապետ Նիկոլ Փաշինյանը կայցելի ԱՄՆ մայրաքաղաք Վաշինգթոն: Այցը նշանավորում է հայ-ամերիկյան հարաբերություններում նոր շրջափուլ: Վերջին տասնամյակում Հայաստանի և ԱՄՆ ղեկավարների միջև պաշտոնական հանդիպումներ գրեթե չեն եղել։ Վերջին անգամ 2010 թվականի ապրիլի 12-ին Վաշինգթոնում Միջուկային անվտանգության գագաթնաժողովի շրջանակներում Հայաստանի նախագահ Սերժ Սարգսյանը հանդիպում է ունեցել ԱՄՆ նախագահ Բարաք Օբամայի հետ։
Վարչապետ Փաշինյանի այս այցը կարևոր է մի քանի առումով։ Նախ, այն համահունչ է Հայաստանի՝ որպես քրիստոնյա պետության, միջազգային դիրքավորման հետ։ Հայաստանը, լինելով առաջին պետությունը, որը քրիստոնեությունը պետական կրոն է հռչակել, և միանալով 2020 թվականին հիմնադրված Կրոնական ազատության միջազգային դաշինքին, ամրապնդում է իր հանձնառությունը կրոնական և համոզմունքի ազատությունների պաշտպանության նկատմամբ։ Այս նախաձեռնության շրջանակներում Հայաստանն աջակցում է մարդու հիմնարար իրավունքներին և կրոնական փոքրամասնությունների պաշտպանությանը, ինչը համապատասխան է ոչ միայն ազգային արժեքներին, այլև համաշխարհային կարևորությանը։
Փաշինյանի մասնակցությունը գագաթնաժողովին նաև հնարավորություն է խոսելու Հայաստանի տարածած խաղաղասիրական ուղերձների մասին, քննարկելու տարածաշրջանային խնդիրները և ամրապնդելու միջազգային հանրության աջակցությունը։
Առանձնահատուկ կարևոր է, որ վարչապետը առանձին աշխատանքային հանդիպում ունենա նախագահ Դոնալդ Թրամփի հետ Սպիտակ տանը։ Սա բացառիկ հնարավորություն է՝ ամրապնդելու հայ-ամերիկյան հարաբերությունները և Հայաստանի շահերն առաջ տանելու՝ ինչպես քաղաքական, այնպես էլ տնտեսական և անվտանգային ոլորտներում։ Առանձին հանդիպումը կունենա բարձր խորհրդանշական նշանակություն՝ ընդգծելով 2025թ. հունվարի 14-ին հաստատված ԱՄՆ-Հայաստան ռազմավարական գործընկերությունը՝ դրանից բխող կարևորությունը ԱՄՆ-ի արտաքին քաղաքականության օրակարգում։
Վարչապետ Փաշինյանի և նախագահ Թրամփի այս հանդիպումը կլինի նրանց միջև արդեն երրորդ անձնական շփումը։ Առաջին անգամ նրանք հեռախոսազրույց են ունեցել 2024-ի նոյեմբերի 16-ին՝ Թրամփի նախագահ դառնալու առթիվ։ Երկրորդ շփումը տեղի է ունեցել 2024թ. դեկտեմբերի 9-ին Փարիզում, երբ Ֆրանսիայի նախագահ Մակրոնի հրավերով Փաշինյանը և ԱՄՆ ընտրված նախագահ Թրամփը մասնակցում էին Փարիզի Աստվածամոր տաճարի հիմնարկեքի արարողությանը։ Այդ հանդիպումները ցույց են տալիս, որ Փաշինյանը և Թրամփը որոշակի անձնական շփումներ ունեն, ինչը կարող է նպաստել հարաբերությունների առավել արդյունավետ զարգացմանը։
Սպիտակ տանը կայանալիք հանդիպումը, հատկապես փետրվարի 5-ին նախատեսվող ազգային աղոթքի նախաճաշի շրջանակներում, հնարավորություն կտա քննարկել Հայաստանի առաջնահերթությունները և ամրապնդել ամերիկյան աջակցությունը մեր երկրի ժողովրդավարական ինստիտուտներին։
Այս այցը ոչ միայն խորհրդանշական է, այլև կարող է դառնալ վճռորոշ քայլ հայ-ամերիկյան համագործակցության նոր դարաշրջանի մեկնարկի համար»։