«Հայոց ցեղասպանությունը ՄԱԿ փաստաթղթերում նշված է` որպես միջազգային ոճրագործություն». Տիգրան Խզմալյան

Եվրոպական կուսակցության ղեկավար Տիգրան Խզմալյանի ֆեյսբուքյան գրառումը․ «Անհրաժեշտ եմ համարում պատասխանել ՀՀ Վարչապետ Նիկոլ Փաշինյանի, կարծեմ, հունվարի 24-ին Շվեյցարիայում արված հայտարարությանը՝ «Ո՞նցա եղել, որ 1939 թվին Հայոց Ցեղասպանության օրակարգ չի եղել, և ոնցա, որ 1950 թվին Հայոց Ցեղասպանության օրակարգը հայտնվել ա»։
Հայոց ցեղասպանությունը Միավորված Ազգերի Կազմակերպության (ՄԱԿ) փաստաթղթերում նշված է՝ որպես միջազգային ոճրագործություն։
ՄԱԿ-ն ինքը պաշտոնապես ստեղծվեց 1945 թվականի հոկտեմբերի 24-ին, փախարինելով Երկրորդ Համաշխարհային պատերազմի պատճառով գոյությունն ավարտած Ազգերի Լիգան, հետևաբար, Ցեղասպանության հարցը պաշտոնապես հռչակող միջազգային ատյան 1939 թ. չկար։ Սակայն արդեն 1946 թվականի դեկտեմբերի 11-ին, իր ստեղծումից մեկ տարի անց, ՄԱԿ-ը հռչակեց, որ ցեղասպանությունը միջազգային իրավունքի նորմերով հանցագործություն է և դատապարտվում է ամբողջ մարդկության կողմից։ 1948 թվականի դեկտեմբերի 9-ին ՄԱԿ-ի գլխավոր ասամբլեան ընդունում է Ցեղասպանության հանցագործությունը կանխելու և դրա համար պատժի մասին կոնվենցիան, որտեղ տրված է ցեղասպանության սահմանումը, խոսվում է ցեղասպանության հրահրման կամ գործադրման համար մեղավորի՝ լինի դա պետություն, առանձին պաշտոնյա կամ անձ, պատասխանատվության մասին։
Առնվազն տարօրինակ է և տարակուսելի, որ Հայոց Ցեղասպանության հարցը «քննարկման» է դրվում ՀՀ վարչապետի կողմից, այն էլ Արցախի 2023 թ. դեռևս չդատապարտված և պաշտոնապես պետական մեղադրանքի չարժանացած ցեղասպանական հայաթափման պայմաններում»։