«Ընկալումների փոփոխությունն օգնելու է, որ մենք չվախենանք, թե մեզ նորից ցեղասպանելու են»․ Արսեն Թորոսյան

Հանրային հեռուստաընկերությանը տված հարցազրույցում ՀՀ ԱԺ «Քաղաքացիական պայմանագիր» խմբակցության պատգամավոր Արսեն Թորոսյանն անդրադառնալով հարցին՝ մենք չպետք է հրաժարվենք, չէ՞, Հայոց ցեղասպանության ճանաչումից, արձագանքեց․ «Դա տարբեր երկրների խնդիրն է։ Դա ՀՀ արտաքին քաղաքականության առաջնահերթություն չպետք է լինի մեկընդմիշտ։ Եղել է, և մենք հիմա դրա պտուղները քաղում ենք»։

Ի պատասխան այն հարցի, որ եթե Հայոց ցեղասպանության ճանաչում չլինի ՀՀ արտաքին քաղաքականության առաջնահերթություններից, դա թո՞ւյլ է տալու, որ կարողանանք Թուրքիայի հետ հարաբերություններ կառուցել, Թորոսյանը նշեց․ «Մենք Թուրքիայի հետ հարաբերությունները կառուցում ենք՝ անկախ որևէ նախապայմանից, բայց վարչապետի հարուցած բանավեճը արտաքին քաղաքականության, Թուրքիայի հետ հարաբերություններ կառուցելու համար չէ, այլ մեր ներքին ընկալումների ճշգրտման համար է․․․ Ցեղասպանություն արած երկիրը մեր հարևանն է, և մենք ոչ մի տեղ չենք կարող փախչել, պետք է հարաբերվենք նրանց հետ․․․
Մեր ընկալումների փոփոխությունն օգնելու է, որ մենք չվախենանք, թե մեզ նորից ցեղասպանելու են, և չվախենանք, որ եթե մոսկովյան իշխանությունները չլինեն, մեզ հոշոտելու են, դրանք եղել են ներմուծված գաղափարներ»։