«Պետության հիմքերը խարխլող մեդիատեռորին լծվել են նաև «կլասիկ» քաղաքական գործիչները»․ Արսեն Թորոսյան

ԱԺ «Քաղաքացիական պայմանագիր» խմբակցության պատգամավոր Արսեն Թորոսյանի թելեգրամյան գրառումը․ «Մենք կանգնած ենք մի իրականության առաջ, որտեղ որոշ շրջանակներ, չկարողանալով նույնիսկ ճշմարտանման հակափաստարկներ ներկայացնել մեր վարած տարբեր քաղաքականությունների դեմ, իրենց գոյությունը հիշեցնելու և ըստ էության պետության հիմքերը խարխլելու համար զանգվածաբար դիմում են քայքայիչ մեդիատեռորի մեթոդներին։

Այս մեթոդներն ընդգրկում են տեղեկատվության խեղաթյուրումը և աբսուրդի հասնող մանիպուլյացիաները, ինչպիսիք են՝ «ադրբեջանցիների» պարը, հակառակորդի կեղծիքների տարածումը, բանկային գաղտնիքի շահարկումը, Մասիսով ստորագրությունը, Տելսելի տոմսը, ավտոբուսի համարը, ՀՀ դրոշի թեման և այլ արհեստական աղմուկներ։

Ավելին, այս քարոզչական արշավը հաճախ իրականացվում է միաժամանակ տարբեր ուղղություններով, որպեսզի մենք պարզապես չհասցնենք ճշգրիտ տեղեկատվությամբ փարատել հանրության կասկածները։ Սա ևս այդ մեդիատեռորի «ռազմավարության» մաս է՝ հանրային վստահությունը խարխլելու և պետական ինստիտուտները թուլացնելու նպատակով։

Ամենահետաքրքիրն այն է, որ վերջին շրջանում այս մեդիատեռորին լծվել են ոչ միայն անհայտ տելեգրամ ալիքները, ֆեյքերի բանակները և բլոգերները, այլև դասական («կլասիկ») քաղաքական կուսակցություններն ու գործիչները։ Սա նրանց քաղաքական սնանկության և անզորության ամենավառ ապացույցն է։

Այս իրավիճակում, որը հատկապես ընտրությունների նախաշեմին սրվելու հակում ունի, մենք պետք է հավելյալ ջանքեր գործադրենք այս արշավին դիմագրավելու համար։ Սա միայն մեր քաղաքական դիրքորոշման հարց չէ. այն ուղիղ կապ ունի մեր պետության կայունության և ժողովրդավարության պահպանման հետ։

Դիմակայելը դժվար է լինելու, բայց անխուսափելի և իրագործելի»։