«Տրանսպորտի բոյկոտը գաղափարական բնույթ չի կրում». Կարեն Հեքիմյան

Հասարակական գործիչ Կարեն Հեքիմյանի ֆեյսբուքյան գրառումը. «Մեկն ասում է՝ բոյկոտում եմ, «ուղղակի մերոնք հեռախոսիս տոմսեր են ուղարկում»:
Մյուսն ասում է՝ բոյկոտում եմ, «ուղղակի հունվարին փետրվարի համար տոմսերի փաթեթ եմ գնել»:
Էն մյուսն ասում է՝ բոյկոտում եմ, «ուղղակի մեկ տոմս միշտ մոտս ունենում եմ»:
Հաջորդն ասում է՝ բոյկոտում եմ, «ուղղակի մեծ կին եմ»:
Մի խոսքով, ցավոք, բացի հանրային գործիչներից, ես չեմ տեսել մեկին, ով բացահայտ բոյկոտի՝ առանց «ուղղակիի»: Չէ, տեսել եմ շատերին, ովքեր չեն վճարում, սակայն վերջիններիս չվճարելը գաղափարական բնույթ չի կրում՝ պահի ազդեցությամբ, եթե հնարավորություն է ընձեռնվում՝ չեն վճարում: Այսինքն, եթե նրանց պարտադրեն վճարել, նրանք խելոք կվճարեն:
Ասածս այն է, որ առանց գաղափարական հիմքի բոյկոտ չի լինում:
Բերեմ օրինակ:
Ես երբեք «Երևան Սիթի»-ում չեմ եղել:
Ես երբեք «Մուլտի Գրուպ» ընկերությանը պատկանող գազալցակայաններից չեմ օգտվել:
Ես երբեք «Կոտայք» գարեջուր չեմ խմել:
Ես երբեք «Միկա» բենզալցակայաններից բենզին չեմ լցրել:
Ես երբեք «Աէրոֆլոտ»-ի տոմսեր չեմ գնել:
Ես երբեք ՎՏԲ բանկ չեմ մտել:
Կարող եմ շարունակել: Սա է իրական գաղափարական բոյկոտը: Շատ կցանկանայի, որ տրանսպորտի բոյկոտը գաղափարական բնույթ ունենար: Բոյկոտի նշույլներ կան, սակայն դրանք գաղափարական բնույթ չեն կրում: Եվ, եթե չլիներ որոշ գործիչների խանդավառությունը (էնտուզիազմը), ոչ մի բոյկոտ էլ չէր լինելու»: