«Եկեք ես ձեզ տանեմ Քոչարյանի «հանձնած» Մեղրի, դուք ինձ տարեք ձեր պահած Լեռնային Ղարաբաղ»․ Աննա Գրիգորյան

ԱԺ «Հայաստան» խմբակցության պատգամավոր Աննա Գրիգորյանը, անդրադառնալով «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագծին, ասաց, որ այն «ֆարս է, մեծ փուչիկ»։
Նա իր ելույթում ՔՊ-ականներին կոչ արեց նաև չմոլորեցնել հանրությանը, երբ խոսում են Մեղրիի մասին։

«Ալիևի կողմից եղել է առաջարկ, բանակցությունների արդյունքում Քի Վեսթի փաստաթուղթ է ձևավորվել ԵԱՀԿ Մինսկի խմբի համանախագահող երկրների կողմից։ Առաջարկ է եղել, որը բանակցությունների ընթացքում դարձել է քիվեսթյան փաստաթուղթ, որի արդյունքով պետք է Լեռնային Ղարաբաղը Լաչինով դառնար Հայաստանի մաս, Նախիջևանը կապ էր ստանում Ադրբեջանի հետ և որևէ տեղ «Մեղրի» տեղանուն նշված չէր»,- ասաց նա՝ շարունակելով.

«Մեղրին իր տեղում է, չէ՞, չի կորել։ Եկեք ես ձեզ տանեմ Քոչարյանի «հանձնած» Մեղրի, դուք ինձ տարեք Լեռնային Ղարաբաղ, ձեր պահած Լեռնային Ղարաբաղ»։